कपिलवस्तु । कपिलवस्तुमा आगामी शुक्रबारदेखि आइतबारसम्म भारी वर्षा, मेघगर्जन, चट्याङ तथा हावाहुरीको सम्भावना रहेकाले जिल्ला प्रशासन कार्यालयले उच्च सतर्कता अपनाउन आग्रह गरेको छ।
नेपाल मौसम विज्ञान विभागको पूर्वानुमान महाशाखा तथा राष्ट्रिय विपद् जोखिम न्यूनीकरण तथा व्यवस्थापन प्राधिकरण (NDRRMA) बाट जारी सूचनालाई आधार बनाउँदै जिल्ला प्रशासन कार्यालय कपिलवस्तुले असोज ९ गते शुक्रबारदेखि ११ गते आइतबारसम्म जिल्लालगायत देशका विभिन्न स्थानमा भारी वर्षाको सम्भावना रहेको जनाएको हो।
भारी वर्षाका कारण बाढी, पहिरो तथा डुबानको जोखिम बढ्न सक्ने भएकाले जोखिमयुक्त क्षेत्रका बासिन्दालाई विशेष सावधानी अपनाउन प्रशासनले अनुरोध गरेको छ। जिल्ला प्रशासन कार्यालयले नदी किनार तथा बाढी–पहिरोको जोखिममा रहेका बस्तीमा स्थानीय तहले स्वीकृत मनसुन पूर्वतयारी तथा प्रतिकार्य योजनाअनुसार आवश्यक तयारी गर्न र उद्धार तथा प्रतिकार्यका लागि तयार अवस्थामा रहन आग्रह गरेको छ।
त्यस्तै, वर्षाका कारण हुनसक्ने बाढी, पहिरो, डुबान र कटानजस्ता विपद्बाट मानवीय तथा भौतिक क्षति हुन नदिन समयमै सतर्कता अपनाउन भनिएको छ। नाला तथा कल्भर्ट सफा गरी पानीको बहावलाई सहज बनाउनसमेत प्रशासनले आग्रह गरेको छ।
प्रशासनले अत्यन्त जरुरी नभएसम्म घरबाहिर ननिस्कन, विशेषगरी टाढा तथा रातको समयमा यात्रा नगर्न र बाढी, पहिरो तथा डुबानको जोखिममा रहेका बस्तीका नागरिकले सुरक्षित क्षेत्र तथा सुरक्षित स्थानबारे जानकारी लिन अनुरोध गरेको छ। विपद्को अवस्था सिर्जना भएमा जिल्लास्थित सुरक्षा निकाय, स्थानीय तह तथा स्वयंसेवकलगायत सम्बन्धित सबै निकायलाई स्वीकृत प्रतिकार्य योजनाअनुसार तयारी अवस्थामा रहन निर्देशन दिइएको छ।
आपत्कालीन अवस्थामा नजिकको सुरक्षा निकाय वा सम्बन्धित आपत्कालीन सम्पर्क नम्बरमा तत्काल जानकारी गराउन पनि प्रशासनले आग्रह गरेको छ।
