कपिलवस्तु, असोज ८ गते । नेपाली कांग्रेस कपिलवस्तुले १५औँ महाधिवेशनअन्तर्गत जिल्लाका १० वटै स्थानीय तहमा पालिका स्तरीय समितिको नेतृत्व चयन गरेको छ । ९ पालिकामा सभापति निर्विरोध निर्वाचित भएका छन् भने यशोधरा गाउँपालिकामा निर्वाचनमार्फत नेतृत्व चयन भएको छ ।
निर्वाचन समितिका अनुसार कपिलवस्तु नगरपालिकाको सभापतिमा प्रकाश गैरे, बुद्धभूमि नगरपालिकामा सुरजप्रताप राणा, बाणगङ्गा नगरपालिकामा रविराज आचार्य, महाराजगञ्ज नगरपालिकामा रामअचल चौधरी र कृष्णनगर नगरपालिकामा राकेशमणि त्रिपाठी निर्विरोध निर्वाचित हुनुभएको छ ।
त्यस्तै शुद्धोधन गाउँपालिकाको सभापतिमा नरेश अहिर, मायादेवी गाउँपालिकामा चन्द्रिका यादव, विजयनगर गाउँपालिकामा रामकुमार यादव र शिवराज नगरपालिकाको सभापतिमा मधु पोख्रेल निर्विरोध निर्वाचित हुनुभएको निर्वाचन समितिले जनाएको छ ।
यशोधरा गाउँपालिकाको सभापतिमा भने निर्वाचनमार्फत चन्द्रप्रकाश दुबे निर्वाचित हुनुभएको छ । उहाँले ९८ मत प्राप्त गर्दा उहाँका प्रतिस्पर्धी जगदिश पाण्डेयले ८४ मत प्राप्त गर्नुभएको थियो । दुबे १४ मतको अन्तरले विजयी हुनुभएको हो ।
यससँगै नेपाली कांग्रेस कपिलवस्तुका १० वटै पालिका कार्यसमितिको नेतृत्व चयन भएको छ । कांग्रेसले १५औँ महाधिवेशनअन्तर्गत पालिका तहको अधिवेशनमार्फत नयाँ नेतृत्व चयन गरेको हो ।
