काठमाडौँ । नेपाली काँग्रेसका नेता ज्ञानेन्द्रबहादुर कार्की महाधिवेशन प्रतिनिधिमा निर्विरोध चयन भएका छन्।
सुनसरी-४ को क्षेत्रीय अधिवेशनबाट कार्की खस आर्यतर्फको महाधिवेशन प्रतिनिधिमा निर्विरोध निर्वाचित भएका हुन्। निर्वाचन अधिकृत दामोदर दाहालका अनुसार कार्की यसअघि बराहक्षेत्र नगरपालिका-१० बाट क्षेत्रीय प्रतिनिधिमा पनि निर्विरोध चयन भएका थिए।
महाधिवेशनको पूर्वसन्ध्यामा कार्की पूर्वसभापति शेरबहादुर देउवाको समूहबाट बाहिरिएर संस्थापन पक्षमा फर्किएका थिए। देउवा समूहबाट बाहिरिएर पार्टीको मूलधारमा फर्किएका अन्य नेतासँगै कार्कीलाई पनि काँग्रेसले केन्द्रीय सदस्य बनाएको थियो।
क्षेत्रीय अधिवेशनबाट निर्विरोध महाधिवेशन प्रतिनिधि चयन भएसँगै कार्की काँग्रेसको आगामी महाधिवेशनमा प्रतिनिधिका रूपमा सहभागी हुने भएका छन्।
