कपिलवस्तु, असोज १३ गते । कपिलवस्तुका प्रमुख जिल्ला अधिकारी (सीडीओ) जनार्दन गौतमलाई स्थानीय तह, जिल्ला प्रशासन र सुरक्षा निकायका प्रतिनिधिले सम्मानसहित बिदाइ गरेका छन् ।
जिल्लाका स्थानीय तह र जिल्ला प्रशासनबीच सहकार्य, समन्वय तथा आपसी सम्बन्धलाई आत्मीय रूपमा अघि बढाउन गौतमले पुर्याउनुभएको योगदानको कदर गर्दै उहाँलाई बिदाइ गरिएको हो ।
बिदाइ कार्यक्रममा सहभागी स्थानीय तहका जनप्रतिनिधि तथा सुरक्षा अधिकारीहरूले गौतमको कार्यकालमा जिल्ला प्रशासन र स्थानीय तहबीचको समन्वय थप प्रभावकारी बनेको उल्लेख गर्दै आगामी जीवन सुखद, स्वस्थ, सफल र मंगलमय रहोस् भन्ने शुभकामना दिएका थिए ।
सहसचिव गौतमले असोज १४ गतेदेखि लागू हुने गरी गृह मन्त्रालयमा राजीनामा दिनुभएको छ । सेवा अवधिको करिब सात महिना बाँकी रहँदै उहाँले स्वेच्छिक अवकाश रोज्नुभएको हो । उहाँ ५८ वर्ष पूरा भएपछि २०८४ वैशाख ५ गते अनिवार्य अवकाशमा जाने अवस्थामा हुनुहुन्थ्यो ।
गौतम गत कात्तिक १३ गते कपिलवस्तुको प्रमुख जिल्ला अधिकारीका रूपमा हाजिर हुनुभएको थियो । २०७७ चैतमा सहसचिव बन्नुभएका उहाँले उदयपुर, सप्तरी, सिन्धुली, तनहुँ, गुल्मी र कपिलवस्तुलगायत जिल्लाको प्रशासनिक नेतृत्व सम्हाल्नुभएको थियो ।
बिदाइ कार्यक्रममा कपिलवस्तु नगरपालिकाका प्रमुख सुदीप पौडेल, कृष्णनगर नगरपालिकाका प्रमुख रजतप्रताप शाह, शिवराज नगरपालिकाका प्रमुख अजय थापा, महाराजगञ्ज नगरपालिकाका प्रमुख अब्दुल कलाम, विजयनगर गाउँपालिकाका अध्यक्ष गोपालबहादुर थापा र शुद्धोधन गाउँपालिकाका अध्यक्ष कमलेशशरण चौधरी सहभागी हुनुहुन्थ्यो ।
त्यस्तै प्रहरी उपरीक्षक मनोहरप्रसाद भट्ट, सशस्त्र प्रहरी उपरीक्षक गोपाल अधिकारी, कपिलवस्तु नगरपालिकाका प्रमुख प्रशासकीय अधिकृत विनयकुमार श्रीवास्तव, वरिष्ठ प्रशासकीय अधिकृत पदमराज श्रेष्ठलगायतको सहभागिता थियो ।
कार्यक्रममा सहभागीहरूले पदबाट बिदाइ भए पनि गौतमसँगको आत्मीयता, सहकार्य र कार्यकालका स्मरणहरू सदैव कायम रहने बताएका थिए ।
