चाडपर्वका बेला यात्रुहरुको चाप बढेसँगै सार्वजनिक यातायातमा हुन सक्ने बढी भाडा असुली, टिकट ठगी, दुर्व्यवहार तथा अन्य समस्या तत्काल समाधान गर्न कोशी प्रदेश प्रहरीले निगरानी र सुरक्षा व्यवस्था कडा बनाएको छ । प्रहरीले मोरङसहित प्रदेशका ४८ स्थानमा यात्रु सहायता कक्ष सञ्चालनमा ल्याउँदै यात्रुलाई सहज, सुरक्षित र भरपर्दो यात्रा सुनिश्चित गर्ने जनाएको छ ।
दसैं, तिहार र छठलगायतका चाडपर्वमा घर फर्किने यात्रुहरुको चाप बढेसँगै मोरङसहित कोशी प्रदेशमा सार्वजनिक यातायातलाई सुरक्षित, व्यवस्थित र यात्रुमैत्री बनाउन प्रहरीले निगरानी बढाएको हो । जिल्ला प्रहरी कार्यालय मोरङ र जिल्ला ट्राफिक प्रहरी कार्यालयको संयुक्त पहलमा विराटनगर बसपार्कमा स्थापना गरिएको सहायता कक्षको कोशी प्रदेश प्रहरी प्रमुख डिआइजी शेखर खनालले उद्घाटन गरे ।
चाडपर्वका बेला यात्रुहरुले समस्या पर्दा प्रहरी कार्यालय खोज्दै भौंतारिनुपर्ने अवस्था अन्त्य गर्दै घटनास्थलमै गुनासो सुन्ने र तत्काल सम्बोधन गर्ने उद्देश्यले सहायता कक्ष सञ्चालन गरिएको डिआइजी खनालले बताए । उनले सार्वजनिक यातायातमा बढी भाडा लिने, यात्रुहरुलाई ठगी गर्ने, दुव्र्यवहार गर्ने वा अन्य कुनै समस्या सिर्जना भए सहायता कक्षमा रहेका प्रहरी तथा यातायात व्यवसायीका प्रतिनिधिलाई जानकारी गराउन आग्रह गरे ।
डिआइजी खनालले भने, ‘गुनासो सुन्ने मात्रै नभई तत्काल समाधानका लागि प्रहरी सक्रिय हुनुपर्छ । यात्रुहरुलाई कुनै पनि बहानामा दुःख दिन हुँदैन । सहायता कक्षबाटै यात्रुहरुका गुनासा सुन्ने र तत्काल समाधान गर्ने व्यवस्था मिलाइएको छ ।’
चाडपर्वलाई शान्तिपूर्ण र उल्लासमय बनाउन जुवातास, मादक पदार्थ सेवन तथा अन्य अवाञ्छित गतिविधि नियन्त्रणमा प्रहरी सक्रिय रहेको उल्लेख गर्दै डिआइजी खनालले सार्वजनिक स्थलमा कुनै गडबडी देखिए तत्काल प्रहरीलाई खबर गर्न सर्वसाधारणसँग आग्रह गरे ।
मोरङ प्रहरी प्रमुख एसपी कवित कटवालले चाडपर्वमा सार्वजनिक यातायातमा यात्रुहरुले भोग्नुपर्ने समस्यालाई मध्यनजर गर्दै सवारीसाधनमाथि निगरानी बढाइएको बताए । उनका अनुसार बढी भाडा असुली, यात्रुहरुलाई जथाभावी तानातान गर्ने, सामानको सुरक्षा नगर्ने, आरक्षण सिट कार्यान्वयन नगर्ने तथा क्षमताभन्दा बढी यात्रु राख्ने समस्या चाडपर्वका बेला बढी देखिने गरेका छन् ।
यातायात व्यवसायी र ट्राफिक प्रहरीको सक्रियतामा स्थापना गरिएका कक्षलाई प्रभावकारी बनाउन प्रहरी परिचालन गरिएको छ । यात्राका क्रममा कुनै समस्या आए तत्काल सहायता कक्ष, ट्राफिक प्रहरी वा नजिकको सुरक्षा निकायमा जानकारी गराउन एसपी कटवालले आग्रह गरे ।
