कपिलवस्तु । कोभिड संक्रमणसंग जुधिरहेका संक्रमितहरुलाई तौलिहवाका स्थानीय अगुवा युवाहरुले घर दैलोमा पुगी भेटघाट तथा पोषिलो खानेकुराहरु प्रदान गरेका छन् । सदरमुकाम तौलिहवाका स्थानीय युवा तथा नेपाल विद्यार्थी संघका पुर्व केन्द्रिय सहमहामन्त्री प्रकाश घिमिरे नेतृत्वको युवाहरुको टोलीले यस्तो अभियान संचालन गरेका हुन् ।
संक्रमितको घरमा पुगी संक्रमितको स्वास्थ्य अवस्था बुझ्ने, संक्रमितहरुलाई पोषिलो खानेकुराहरु उपहार स्वरुप प्रदान गर्ने, संक्रमित अति विपन्न भए त्यस्ता विपन्नहरुका लागि खाद्यान्न समेत उपलब्ध गराउने लगायतका काममा आफुहरु हातेमालो अभियान लिएर सक्रिय भई अघि बढेको संयोजक घिमिरेले बताए ।
युवाहरुले स्वतस्र्फुत रुपमा आफुहरु स्वयंले रकम संकलन गरि यो अभियान शुरु गरेका हुन् । अभियानमा स्थानीय अगुवाहरु नेपाली कांग्रेसका कार्यवाहक नगर सभापति प्रशान्त कार्की, डा. गगन कुमार सिंह, अनिल क्षेत्री, सन्दिप शर्मा लगायतका युवाहरु सहभागी छन् । करीब १ महिना अघि बाट उनीहरुले यो अभियान शुरु गरेका हुन् ।
संक्रमितको घर दैलोमा पुगेर भेटघाट गरी संक्रमितको अवस्था बुझ्दा मात्रै पनि संक्रमितहरुमा ठुलो उत्साह बढ्ने गरेको आफुहरुले पाएको अभियानका संयोजक प्रकाश घिमिरेले बताए । मानवीय सहयोगका लागि आफुहरुले अभियान शुरु गरेको उनले बताए । अभियान अन्र्तगत करीब १ सय बढीको घर दैलोमा उनीहरु पुगी सकेका छन् ।
अभियानको शुरुवाती चरणमा आफैबाट उनीहरुले रकम संकलन गरी राहत बांडेका छन् । पछिल्लो समयमा फेसबुक क्याम्पेनिंङ्गबाट समेत राहत वितरणका लागि उनीहरुलाई विभिन्न व्यक्तिहरुबाट सहयोग आउन थालेको छ । यसरी आएको सहयोग रकम पूर्ण पारदर्शी ढंगबाट खर्च गरिने र अभियानको समाप्ति पछि फेसबुक मार्फत सार्वजनिक गरिने अभियानका एक सदस्य नेपाल विद्यार्थी संघका जिल्ला उपाध्यक्ष अनिल कुमार क्षेत्रीले बताए । उनीहरुको यो अभियानलाई स्थानीय स्तरमा ठुलो प्रशंसा गरिएको छ ।
जिल्लामा सामाजिक तथा मानवीय सेवाको काम गर्न सक्रिय युवाहरु मध्ये यी अभियानका युवाहरु पनि अग्रपंक्तिमा रहने गरेका छन् । अघिल्लो वर्षको लक डाउनमा अति विपन्न परिवारलाई राहत वितरण कार्य, केही वर्ष अघि तौलिहवा क्षेत्रको सरसफाईमा सुन्दर कपिलवस्तु अभियान, भुकम्प जांदा राहत संकलन तथा वितरण, आगलागी तथा अन्य प्राकृतिक विपत्तिका बेला राहत वितरण लगायतका काममा अभियानका संयोजक प्रकाश घिमिरे र उनको समूह सक्रिय भई अघि बढ्दै आएका छन् ।
