वुटवल। लुम्बिनी प्रदेशका मुख्यमन्त्री शंकर पोखरेलको पद धरापमा परेको छ । वैशाखमा अविश्वासको प्रस्ताव छल्नको निम्ती विहान राजीनामा दिएर साँझ फेरी मुख्यमन्त्रीको नियुक्ती लिएका उनको पद जसपाको आधिकारिकता उपेन्द्र समूहले पाएसँगै धरापमा परेको हो ।
यसअघि गठबन्धनबाट माओवादी केन्द्रका नेता कुलप्रसाद केसीको बहुमतमा हुँदाहुँदै पोखरेलले जबर्जस्ती मुख्यमन्त्रीको सपथ लिएका थिए। प्रदेश प्रमुख धर्मनाथ यादव आफ्नो पक्षका भएकाले अल्पमत हुँदाहुँदै पोखरेलले गत वैशाख १९ गते राजीनामा दिएर पुनः सपथ लिएका थिए।
लुम्बिनी प्रदेश सभामा पोखरेल पक्षका ४१ जनामध्ये २ जनाले राजीनामा दिइसकेका छन् भने विमला ओली उपनिर्वाचनबाट निर्वाचित भएकाले माओवादीलाई समर्थन गरेकी छन्। हाल मुख्यमन्त्रीको पक्षमा ३८ जना मात्रै छन्। त्यसमध्ये विष्णु पन्थी र रमा घर्ती वरिष्ठ नेता माधवकुमार नेपाल पक्षतिर खुलेर लागिसकेका छन्।
नेपाल पक्षमा भए पनि अरु नेता खुलेर बाहिर नदेखिएकाले पोखरेलकै पक्षमा जोडिएको छ। यसो हुँदा पोखरेलको पक्षमा ३६ जना सांसद मात्रै छन्। पोखरेलले जनता समाजवादी पार्टीबाट ३ जना सांसदलाई मन्त्री बनाएर आफ्नो पक्षमा पारेका थिए। त्यसपछि आफ्नो बहुमत पुग्ने आकलन गरेर विश्वासको मत लिने सार्वजनिक रुपमा बताउँदै आएका थिए।
जसपा उपेन्द्र यादवले आधिकारिकता पाएलगत्तै विजय यादव,कल्पना पाण्डे र सन्तोषकुमार पाण्डेलाई मंगलबार कारबाही गरेपछि पोखरेल संकटमा परेका हुन्। संसदमा स्पष्ट अल्पमत परेपछि पोखरेलले के गर्छन् भन्ने विषयमा चौतर्फी चासोका साथ हेरिएको छ।
अल्पमतमा हुँदाहुँदै उनलाई सहयोग गर्ने प्रदेश प्रमुख धर्मनाथ यादव बिदा भएर माओवादी केन्द्रकै अमिक शेरचन नियुक्त भएकाले उनलाई आफ्नो पद जोगाउन मुस्किल हुने देखिएको छ।
यससँगै उनको विकल्प कि त राजीनामा कि त विश्वासको मत लिनु रहेको छ ।
मुख्यमन्त्रीसँग अब राजीनामा दिनुको विकल्प नरहेको लुम्बिनी प्रदेशका कांग्रेस संसदीय दलका नेता वीरेन्द्र कनोडियाले बताए। केही दिन हेर्छौं, उनले भने, ‘मुख्यमन्त्री पोखरेल अल्पमतमा हुनुहुन्छ। नैतिकताको आधारमा उहाँले राजीनामा दिनुपर्छ।’
यसअघि सरकारपक्षले पनि विश्वासको मत लिने निर्णय भने गरिसकेको छ ।
मुख्यमन्त्रीका दाबेदार कुल प्रसाद केसीले मुख्यमन्त्री पोखरेलले राजीनामा दिनुपर्ने माग गरे । यसअघि पटक पटक राजीनामा माग्दा पनि नपत्याएर जसो तसो पदमै बसिरहेका पोखरेलसँग अब भने दुई विकल्प मात्र रहेका छन् ।
गठबन्धनबाट केसीको पक्षमा माओवादीबाट १८ जना, कांग्रेसबाट १९ जना, जसपाबाट ३ जना र राष्ट्रिय जनमोर्चाबाट एक जना गरी ४१ जना सांसद छन्।
राजीनामा नआए पुनः अविश्वासको प्रस्ताव ल्याउने उनले जानकारी दिए। ‘संसद्मा अल्पमतमा रहेको एमालेले बहुमतमाथि शासन गर्न मिल्दैन,’ उनले भने। पोखरेलले राजीनामा नदिए विपक्षी गठबन्धनले यसअघि तयार पारेको अविश्वास प्रस्ताव पुनः अघि बढाउने उनको भनाइ छ।
