काठमाडौं । दार्चुलामा भारतीय सुरक्षा बल (एसएसबी)ले तुइन काटिदिदा नेपाली युवक वेपत्ता भएको घटनाको छानविन गर्नको निम्ती गृह मन्त्रालयले गठन गरेको छानविन समिति आज दार्चुला प्रस्थान गर्ने भएको छ ।
भारतीय सुरक्षाकर्मीले तुइनको डोरी फुकाइदिंदा दार्चुलाको व्यास गाउँपालिका २ का जयसिंह धामी महाकाली नदीमा खसेर बेपत्ता भएका थियो ।
उक्त घटनाको विषयमा अनुसन्धान गर्न आइतवार गृह मन्त्रालयले गृह मन्त्रालयका सहसचिव जनार्दन गौतम नेतृत्वमा टोली गठन गरेको थियो ।
उक्त टोली आज काठमाडौंबाट हवाईजहाजमार्फत् कैलालीको धनगढी पुग्ने र मंगलबार धनगढीबाट हेलिकप्टर चढेर दार्चुला जाने भएको छ ।
सहसचिव गौतमको संयोजकत्वमा गठित छानविन समितिमा नेपाल प्रहरीका प्रहरी नायव महानिरीक्षक पुरुषोत्तम कंडेल, राष्ट्रिय अनुसन्धान विभागका अनुसन्धान निर्देशक हुतराज थापा, सशस्त्र प्रहरी बल नेपालका सशस्त्र प्रहरी बरिष्ठ उपरीक्षक सुरेश कुमार श्रेष्ठ र जिल्ला प्रशासन कार्यालय, दार्चुलाका सहायक प्रमुख जिल्ला अधिकारी ज्योत्सना भट्ट छन् ।
भारत तर्फको बाटो हुँदै सदरमुकाम खलंगा आउने क्रममा तुइन तरिरहेका ३३ वर्षीय धामी तुइनको तारसँगै महाकाली नदीमा खसेर बेपत्ता भएका थिए । सो घटनाबारे सत्य तथ्य छानविन गरी १० दिन भित्र प्रतिवेदन बुझाउन यस समितिलाई जिम्मेवारी दिइएको छ ।
