राष्ट्रिय जनमोर्चा गण्डकी प्रदेश संसदीय दलको नेतामा पियारी थापा चयन भएकी छन्।
मंगलबार बसेको जनमोर्चा संसदीय दलको बैठकले थापालाई संसदीय दलको नेता चयन गरेको महासचिव मनोज भट्टले जानकारी दिए।
तीन जना सांसद रहेको राजमो प्रदेश सभामा यसअघि संसदीय दलको नेता कृष्ण थापा थिए। थापाले तत्कालिन मुख्यमन्त्री पुथ्वीसुब्बा गुरुङविरुद्ध गठबन्धनको तर्फबाट ल्याइएको अविश्वासको प्रस्तावमा मतदान गर्न पार्टीले दिएको निर्देशन उल्लंघन गरेपछि कारबाहीमा परेका थिए।
सुब्बाको सरकार हटाएर नेपाली कांग्रेसका नेता कृष्णचन्द्र नेपाली पोखरेलको नेतृत्वमा सरकार गठन गर्न महत्वपूर्ण भूमिका खेलेको राष्ट्रिय जनमोर्चा सरकारमा भने सहभागी भएको छैन। सरकार बाहिरैबाट गुण र दोषका आधारमा समर्थन र विरोध गर्ने जनमोर्चाले जनाएको छ।
कृष्ण थापालाई कारबाही गरेपछि प्रमुख सचेतक रहेकी पियारीले नै संसदीय दलको नेताका हैसियतमा काम गर्दै आएकी थिइन्।
यस्तै, प्रमुख सचेतकको जिम्मेवारी खिमविक्रम शाहीलाई दिइएको छ। उनी प्रदेश मामिला सभापतिसमेत हुन्।
