नेकपा माओवादी केन्द्रले दुई दिनसम्म चलेको केन्द्रीय कमिटी बैठकबाट विभिन्न चारवटा चारवटा समसामयिक प्रस्ताव पारित गरेको छ।
राजधानीको अनुपम फुडल्यान्डमा आइतवार सकिएको बैठकपछि बोल्दै प्रवक्ता नारायणकाजी श्रेष्ठले यसबारे जानकारी दिएका हुन्।
प्रवक्ता श्रेष्ठका अनुसार दार्चुलास्थित महाकाली नदीमा खसेर नेपाली युवा जयसिंह धामी बेपत्ता भएको घटनामा भारतीय पक्ष दोषी भएको ठहर बैठकले गरेको छ।
‘दार्चुलाका जयसिंह धामी महाकाली नदीमा बेपत्ता भएको घटनाप्रति पार्टीको ध्यानाकर्षण भएको छ’, उनले भने, भारतीय एसएसबीबाट नै तुइनको तार फुकाइदिएकाले जयसिंह महाकालीमा खसेर बेपत्ता भएको निष्कर्ष बैठकले निकालेको छ।’
भारतीय सीमा सुरक्षा बलको यो कार्यलाई माओवादीले अमानवीय भनेको छ। ‘बैठकले भारतीय एसएसबीको यो कार्यलाई क्रुर र अमानवीय अपमानजनक र उत्पीडनकारी कार्य भनेको छ’, प्रवक्ता श्रेष्ठले भने, ‘नेपाल सरकारलाई यसबारेमा गठित छानबिन टोलीको प्रतिवेदन शीघ्र ल्याइ भारत सरकारसँग कूटनीतिक पहल गरेर दोषीमाथि कारबाही गर्न आग्रह गर्दछ।’
बैठकले केही दिनदेखि बेलायतको लण्डनमा अनशनरत गोर्खा सैनिकहरुले समान सुविधा माग्दै आमरण अनशन बसिरहेकोमा पनि समर्थन जनाएको छ।
‘बृटिश गोरखा सैनिकले लामो समयदेखि संघर्ष गर्दै आएका छन्। हाम्रो पार्टी त्यसमा पूर्ण समर्थन जनाउँछ’, उनले भने, ‘नेपाली हुनुकै कारण यस प्रकारको शोषण र भेदभावमा परेकाले यो व्यक्तिगत विषय मात्रै होइन। राष्ट्रिय स्वाभिमानको कुरा पनि हो। यसबारे छिटो वार्ता गरे गोर्खा सैनिकमाथिको शोषण अन्त्य गरिनुपर्छ।’
माओवादीले बैठकमा गोर्खा भर्तीको प्रक्रिया अघि बढिरहेको अवस्थामा राष्ट्रिय सहमतिको आधारमा त्यसबारे पुनर्विचार गर्न निर्णय लिनुपर्नेमा पनि जोड दिएको छ।
माओवादीले कोरोना संक्रमणका कारणबाट नेपाल पनि प्रभावित भएको बताउँदै यस क्रममा ज्यान गुमाएप्रति श्रद्धाञ्जली व्यक्त गरेको छ।
‘संक्रमित सबैको छिटोभन्दा छिटो स्वास्थ्य लाभको कामना’, बैठकको निर्णयबारे श्रेष्ठले भने, ‘कोभिडको तेस्रो लहरको खतरा औंल्याइरहेको अवस्थामा त्यसको सामना गर्नेबारे सरकारसँग माग गरिएको छ। छिट्टै खोप उपलब्ध गराउन पनि माग गरिएको छ।’
त्यस्तै माओवादीले सिन्धुपाल्चोक, मनाङ लगायत देशका विभिन्न भागमा केही अगाडिदेखि मानवीय क्षति भएको जनाउँदै राहत र उद्धारमा तदारुकताका साथ लाग्न सरकारलाई भनेको छ।
माओवादीले अफगानिस्तानमा अहिले आन्तरिक द्वन्द्वको असहज र संवेदनशील परिस्थिति देखा परेको जनाउँदै त्यहाँका सबै नेपालीको स्थितिबारे जानकारी लिन र जीवन रक्षा गर्न सरकारले तत्काल पहल गर्नुपर्नेमा जोड दिएको छ।
