काठमाडौं । नेकपा एमालेले केन्द्रीय सदस्यको संख्या अद्यावधिक गर्न निर्वाचन आयोगसमक्ष २६० जनाको नाम पठाएको छ।
नेकपा एमालेका अध्यक्ष केपी शर्मा ओलीको नेतृत्वमा मंगलबार संसदको ल्होत्से हलमा भएको संसदीय दलको बैठकले २०३ केन्द्रीय सदस्य रहेको नेकपा एमालेका केन्द्रीय सदस्यहरुको संख्या २६० हुने गरी सूची निर्वाचन आयोगमा पठाएको हो।
आयोग स्रोतका अनुसार एमाले निर्वाचन विभागका प्रमुख अग्नि खरेल र बाबुराम दाहालसहितको टोली आज दिउँसो गएर केन्द्रीय कमिटीको विवरण अद्यावधिक गर्न लिखित आग्रह गरेको हो ।
नेकपाको एकता खारेज भएसँगै पुनर्स्थापित एमालेमा २६४ जना छन् । यो नेकपा माओवादी त्यागेर एमाले गएका नेताहरुसहितको संख्या हो । जमामध्ये केहीको मृत्यु भएको र केही राजनीतिक नियुक्तिमा गएकाले २६० जनाको विवरण अध्यावधिक गर्न पठाइएको हो ।
सरकारले संसदीय दल वा केन्द्रीय समितिमा २० प्रतिशत भए दल विभाजन गर्न पाउनेगरी अध्यादेश पारित गरे लगत्तै एमालेले केन्द्रीय कमिटीको विवरण अद्यावधिक गरेको हो ।
अब पार्टी फुटाउन आवश्यक पर्ने २० प्रतिशत केन्द्रीय सदस्यका लागि माधव नेपाल समूहलाई ५२ जना केन्द्रीय सदस्यको साथ चाहिनेछ।
उता संसदमा एमालेका २०३ सांसद रहेकाले नेपाल पक्षलाई पार्टी फुटाउन ४१ सांसदको सहमति आवश्यक हुन्छ। त्यसकारण पनि नेपालसमूहलाई अप्ठ्यारो बनाउने गरी एमालेले उक्त विवरण पठाएको हो ।
यस्तै समानुपातिक ८ सांसदलाई पनि कारबाही गर्ने तयारी छ । यसअघि सोधिएको स्पष्टीकरणकै आधारमा उनीहरुलाई कारबाही गर्न लागिएको एक नेताले जानकारी दिए ।
