काठमाडौं । एमाले छाडेका १४ सांसदलाई पदमुक्त गर्न संसदमा पत्राचार गरेको एमाले निर्वाचन आयोग पनि पुगेको छ ।
नेकपा एमालेले पार्टी केन्द्रीय कमिटी र संसद सदस्यबाट कारवाही गरिएका १४ जनाको हस्ताक्षर दल विभाजनमा मान्य नहुने भन्दै निर्वाचन आयोगको ध्यानाकर्षण गराएको हो ।
माधव नेपालसहित १४ जनालाई भदौ १ गते नै निष्कासन गरेको विवरण आयोगमा बुझाइसकेको भन्दै एमाले निर्वाचन विभागका प्रमुख अग्नि खरेलसहितको टोली आयोग पुगेको हो ।
आयोगबाट फर्केपछि एमाले नेता खरेलले सभामुखले एमालेको कारवाहीलाई अघि बढाएनन् भन्दैमा निर्वाचन आयोगले कानूनविपरीत जान नमिल्ने बताए । एमालेले भदौ १ गते १४ सांसदलाई पदमुक्त गरेको पत्र संसद सचिवालयमा दर्ता गराएको थियो ।
त्यसपछि सभामुख अग्नि सापकोटाले उनीहरुलाई पदमुक्त गरेको सूचना टाँस गरेका छैनन् । जसकारण एमालेले सापकोटाको कडा आलोचना गर्दै आएको छ ।
