-राम विकास चौधरी, रुपन्देही
रुपन्देहीकै पुरानो सिद्धार्थनगर नगरपालिका वडा नम्बर ५ स्थित भैरहवा नमुना मावि विद्यालय व्यवस्थापन समिति गठन गर्न अध्ययनरत विद्यार्थी र अभिभावकको माग छ ।
विद्यालय व्यवस्थापन समितिको गठन प्रक्रिया यथाशीघ्र अगाडि बढाउन माग गर्दै अध्ययनरत उनीहरूले आइतबार सिद्धार्थनगर नगरपालिकाको शिक्षा शाखामा ज्ञापनपत्र बुझाएका छन् ।
विद्यालय व्यवस्थापन समिति लामो समयदेखि पदाधिकारीविहीन रहेकाले पठनपाठन, विकास निर्माण र विद्यालय सुधारका गतिविधिमा असर परिरहेको उनीहरूको भनाइ छ ।
जिल्लाका अधिकांश विद्यालयमा समिति गठन भइसकेको स्थितिमा नमुना माविमा गठन नहुनु सम्बन्धित सबैको चासो र चिन्ताको विषय बनेको भैरहवा नमुना क्याम्पसका अध्यक्ष तथा भैरहवा नमुना मावि व्यवस्थापन समितिका पूर्वअध्यक्ष आनन्दप्रसाद गुप्ताको प्रतिक्रिया छ ।
विद्यालयका प्रधानाध्यापक चुन्नप्रसाद पाण्डेले कोभिड–१९ को कारण विद्यालय व्यवस्थापन समिति गठन प्रक्रियामा केही ढिलाइ भएको बताए । उनले केही दिनभित्रै अभिभावक भेला बोलाएर समिति गठन प्रक्रिया अगाडि बढाउने जानकारी दिए ।
