नेपाल विद्युत प्राधिकरण परासी वितरण केन्द्रले एक महिनामा १ करोड १० लाख रुपैयाँ बढी बक्यौता असुली गरेको छ । केन्द्रले चालु आर्थिक वर्ष २०७८/७९ को भदौको २४ गतेसम्मको अवधिमा सो बक्यौता असुली गरेको हो ।
लामो समयसम्म विद्युत महसुल नबुझाउने ग्राहकको लाइन काटी बक्यौता असुली गरिएको केन्द्र प्रमुख चुटुन कुमार श्रीवास्तवले बताए । उनका अनुसार लाइन काटिएका ग्राहकमध्ये ३० जनाले जरिवानासहितको १ करोड १० लाख २८ हजार ६ सय रुपैयाँ बक्यौता बुझाएपछि उनीहरुको लाइन पुनःजोडिएको छ ।
बक्यौता बुझाउनेमध्ये सबैभन्दा बढी पवन ईटा उद्योगले ४५ लाख १ हजार १४ रुपैयाँ विद्युत महशुल बुझाएको छ । लुम्बिनी चिनी उद्योगले १७ लाख ८४ हजार ९ सय ५६, पातवारी बानियाँले ६ लाख ७ सय २३ रुपैयाँ बुझाएपछि लाइन पुन जोडिएको छ । यस्तै, पशुपतिनाथ राइस एण्ड चिउरा मिलले १३ लाख रूपैयाँ बुझाएपछि लाइन जोडिएको छ । यसकाे १८ लाख ८६ हजार २ सय ६५ रूपैयाँ बाँकी थियाे । रिद्धिसिद्धी फनिर्चर उद्योग, बाल मैत्री शिक्षा केन्द्र, तिरुपती इटा उद्योगलगायतका ग्राहकले बाँकी महशुल बुभाएपछि लाइन पुन जोडिएको छ ।
महसुल बुझाउन पटक पटक ताकेता गर्दा पनि अटेर गर्ने ग्राहकको लाइन काटि बक्यौता असुली सुरु गरिएको हो । दुई महिना भन्दा बढी समयदेखि विद्युत महसुल नबुझाउने ग्राहकको लाइन काटी बक्यौता असुली अभियानलाई तिव्र गतिमा अघि बढाइएको छ ।
केन्द्र अन्तर्गत विद्युत महसुल खपत बापत दुई अर्ब बढी रकम उठाउन बाँकि छ । जसमा डेडिकेटेड र ट्रकं लाईनबाट विद्युत सेवा लिने ठूला उद्योगको मात्रै झण्डै डेढ अर्ब रुपैयाँ महशुल उठ्न बाँकि छ ।
केन्द्रले विद्युत महसुल संकलन अभियानलाई तिव्र गतिमा अघि बढाएको छ । पहिलो चरणमा एक लाख रुपैयाँसम्म तिर्न बाँँकी हुनेको लाईन काटिनेछ, दोस्रो चरणमा ५० हजारसम्मको लाइन काटि बक्यौता असुल गरिने केन्द्रले जनाएको छ ।
केन्द्रले गत आर्थिक वर्ष २०७७/७८ मा एक करोड २० लाख रुपैयाँ महसुल असुल गरेको थियो । केन्द्र अन्तर्गत प्राधिकरणको विद्युत उपयोग गर्ने ४४ हजार ग्राहक छन् ।
