कपिलबस्तु साउन २०
विश्व स्तनपान सप्ताह २०२२ को अवसरमा कपिलबस्तुमा अन्तरक्रिया कार्यक्रम सम्पन्न भएको छ । ‘हामी सबैको साझा जिम्मेवारी, स्तनपान संरक्षण हुन्छ प्रभावकारी’ भन्ने नारासहित साउन १६ गतेदेखि सुरु भएको २९ औँ विश्व स्तनपान सप्ताहको पाचौ दिन शुक्रबार स्वास्थ्य कार्यालय कपिलबस्तुको आयोजनामा अन्तरक्रिया कार्यक्रम सम्पन्न भएको हो । कार्यक्रममा स्तनपान सप्ताहको उद्धेश्य,महत्व तथा सप्ताहव्यापी कार्यक्रमको बारेमा जानकारी गराउनुका साथै स्तनपानको विशेषता, अवस्था र सञ्चारमाध्यमको भुमीकाको बारेमा छलफल गरिएको थियो ।
कार्यक्रममा स्वास्थ्य कार्यालयका खोप तथा पोषण कार्यक्रमका फोकल पर्सन उमेश घिमिरेले आमा र बच्चाको स्वास्थ्यका लागि स्तनपानको महत्वको बारेमा समुदायमा सुसुचित गर्ने कार्यक्रमको उद्धेश्य रहेको भन्दै आमाको पहिलो दुध बाक्लो र पहेलो हुन्छ, जसमा बच्चालाई रोगसँग लड्ने प्रतिरोधात्मक क्षमता प्रदान गर्न र मस्तिष्क विकास गर्न मद्दत गर्ने बताउनुभएको थियो । उहाँले हरेक सेवा प्रदायक कार्यालयहरुमा स्तनपान कक्ष स्थापना गर्नु पर्ने बताउनुभयोे ।
नेपालमा सन् २०१६ सालको स्तनपानको तथ्याङक अनुसार १ घण्टाभित्र स्तनपान गराउनेको संख्या ५५ प्रतिशत रहेको छ । त्यस्तै सन् २०२१ मा गरिएको स्वास्थ्य संंस्थाहरुकोे तथ्याङक अनुसार कपिलबस्तु जिल्लामा २८ प्रतिशत रहेकोमा स्तनपान गराउनेको संख्या निकै कम छ ।
आमाको दूध बच्चाको लागि अमृत समान हो । यो बच्चाको लागि सबैभन्दा सुपाच्य हुन्छ । तर पछिल्लो समयमा विश्वका आधुनिक महिलाहरुले बच्चालाई स्तनपान गराउने दरमा कमी आएको छ । आधुनिक महिलाहरुले बच्चालाई स्तनपान गराउनु भन्दा आफ्नो फिगरमा बढी ध्यान दिई रहदा फिगर भन्दा पहिला बच्चा र आमाको स्वास्थ्य हो भन्ने उद्देश्यका साथ नेपालमा १९९२ देखि हरेक बर्षको अगस्त १ देखि ७ सम्म मनाइदै आएको स्तनपान दिवसलाई सप्ताहव्यापी रुपमा मनाउने सरकारको निर्णय अनुरुप कपिलबस्तुमा पनि कार्यक्रमको आयोजना गरेर मनाईरहेको स्वास्थ्य कार्यालय कपिलबस्तुका प्रमुख हेमराज पाण्डेले बताउनु भएको छ ।
