तौलिहवा, साउन २८ गते । शिक्षकको अध्यापन अनुमतिपत्र (लाइसेन्स) का लागि परीक्षा दिन कपिलबस्तु आएका परीक्षार्थीलाई कपिलबस्तुमा बास बस्न समस्या भएको छ । विभिन्न जिल्लाबाट लाइसेन्स परीक्षा दिन आएका अधिकांश परीक्षार्थीले सो समस्या भोग्नुपरेको हो ।
शिक्षक सेवा आयोगको व्यवस्थापकीय लापरबाहीका कारण परीक्षार्थीलाई सास्ती भोग्नु परेको पीडितको गुनासो छ । आवेदन दिएको जिल्लामा परीक्षा केन्द्र तोकिएमा सहज हुने सन्धिखार्क नगरपालिका १ का कल्पना भुसालले बताउनुभयो । उहाँले भन्नुभयो “अर्घाखाँचीबाट आयों, होटल नपाएर महुरी होमको एउटा कोठामा ९ जना बस्नुप¥यो, राती पढ्न पनि समस्या भयो ।”
उहाँहरुजस्तै अन्य जिल्लाबाट आएकाहरुलाई पनि त्यस्तै सास्ती भएको पीडितको भनाइ छ । कपिलबस्तुमा करिब सात सय होटल दर्ता रहे पनि बासका लागि करिब १ सय ५० वटा रहेको होटल व्यवसायी संघका अध्यक्ष गोपालबहादुर खत्रीले बताउनुभयो । होटलको क्षमता करिब ३ देखि ४ सय जनालाई राख्नसक्ने मात्र हो अध्यक्ष खत्रीले बताउनुभयो ।
अधिकारकर्मी रवि ठाकुरले आगामी बर्षदेखि सरकारले शिक्षक लाईसेन्सको परीक्षा आबेदन दिएको जिल्लामै सञ्चालन गर्दा उपयुक्त हुने सुझाव दिनुभयो । कपिलबस्तु नगरपालिकाका नगर प्रमुख सुदीप पौडेलका अनुसार लाइसेन्स परीक्षा दिन आएका परीक्षार्थी अलपत्र परेपछि कपिलबस्तु नगरपालिकाको तल्लो र माथिल्लो हलमा बस्ने व्यवस्था मिलाइएको छ ।
त्यस्तै बुद्धभुमि नगरपालिकाले सम्बन्धित केन्द्रसम्म परीक्षा दिन आएका परीक्षार्थीलाई बासको व्यवस्था गरेको नगर प्रमुख केशबकुमार श्रेष्ठले बताउनुभयो ।
निम्न माध्यमिक विद्यालयको लाईसेन्सका लागि कपिलबस्तु नगरपालिका, बाणगंगा नगरपालिका र बुद्धभुमी नगरपालिका गरी ४२ परीक्षा केन्द्र तोकिएको शिक्षा विकास तथा समन्वय इकाई कपिलबस्तुका प्रमुख थानेश्वार घिमिरेले बताउनुभयो ।
लुम्बिनी प्रदेशमा आवेदन दिएका परीक्षार्थीमध्ये १० हजार ७ सय १० जनाको केन्द्र कपिलबस्तुमा तोकिएको ईकाइ प्रमुख घिमिरेले बताउनुभयो । परीक्षा दिन लुम्बिनी प्रदेशका ८ भन्दा बढी जिल्लाका परीक्षार्थी एक दिनअघि यहाँ आइपुगेका हुन् । एउटा केन्द्रमा २ सय ५५ का दरले परीक्षार्थी सहभागी भएको उहाँले बताउनुभयो ।
