भारतीय राजदूतावास (काठमाडौं)ले आज श्रावण ३० गते (१५ अगस्त) भारतको ७६औँ स्वतन्त्रता दिवस मनाएको छ । यस वर्षको स्वतन्त्रता दिवस भारत स्वतन्त्रताको ७५ वर्षको ऐतिहासिक उपलब्धिलाई सम्झना गर्न भारत सरकारले सन् २०२१ मार्चमा अघिसारेको ‘आजादीका अमृत महोत्सव’कै एक हिस्साको रूपमा रहेको जनाइएको छ ।
दूतावासका काउन्सिलर प्रसन्न श्रीवास्तवले झण्डोत्तोलन गरेसँगै स्वतन्त्रता दिवस कार्यक्रमको शुभारम्भ भएको थियो । श्रीवास्तवले भारतका राष्ट्रपति श्रीमती द्रौपदी मुर्मूले स्वतन्त्रता दिवसको अवसरमा देशको नाममा गर्नुभएको सम्बोधन पढेर सुनाए । राष्ट्रपति मुर्मूको सम्बोधनमा भारतको स्वतन्त्रताको खातिर स्वतन्त्रता सेनानीहरूले गरेको बलिदानको सम्झना गर्दै भारतले हासिल गरेको उपलब्धिहरूको चर्चा गरिएको छ । भारतका राष्ट्रवादी कवि कुवेम्पुलाई उदृत गर्दै राष्ट्रपति मुर्मूद्वारा मातृभूमि र भारतीय नागरिकको उत्थानका लागि भारतका युवालाई पूर्ण रुपमा समर्पित भइ अघि बढ्न आह्वान गरिएको छ ।
कार्यक्रममा दूतावासले भारतीय सशस्त्र बलका दिवंगत सैनिकका श्रीमती र निकटतम नातेदारहरुलाई २ करोड ६५ करोड प्रदान गरी सम्मान गर्यो भने दूतावासले आजादीका अमृत महोत्सव हाजिरीजवाफ प्रतियोगिताका विजेताहरूलाई पुरस्कृत गरिएको थियो । देशबाहिर रहेका भारतीय युवा र विदेशी नागरिकलाई भारतबारे जानकारी पाउन प्रेरित गर्ने उद्देश्यले भारतको विदेश मन्त्रालयले सो हाजिरीजवाफको आयोजना गरेको थियो ।
कार्यक्रममा स्वामी विवेकानन्द सांस्कृतिक केन्द्र र केन्द्रीय विद्यालय (काठमाडौं)का शिक्षक तथा विद्यार्थीले देशभक्तिको गीतलगायतका प्रस्तुति दिएका थिए भने दूतावासको फेसबुक पेजमार्फत कार्यक्रमको प्रत्यक्ष प्रसारण गरिएको थियो ।
