साझा न्यूज । कपिलवस्तु
जिल्ला अदालत कपिलवस्तुका न्यायाधीश भुवन गिरी उपर उनकै पत्नीले यौन शोषणको उजुरी दिएकी छिन् । न्यायाधीश गिरीकी दोस्रो पत्नीले आफु यौन शोषणमा परेको भन्दै जिल्ला प्रहरी कार्यालयमा उजुरी दिएकी हुन् ।
दोस्रो पत्नीका रुपमा २०७५ सालमा आरती रावलले न्यायाधीश गिरीसंग दोस्रो विवहा गरेकी थिईन् । न्यायाधीश पत्नी रावलले दिएको उजुरी पारिवारिक भएका कारण प्रारम्भिक छानविन प्रक्रिया अघि बढाईएको जिल्ला प्रहरी कार्यालयले जनाएको छ ।
न्यायाधीश पत्नी रावलले आफ्नो भु्रण हत्या गरिएको, पटक पटक वन्धक बनाएर आफु उपर यौन हिंसा गरिएको, आफुलाई आमा बन्ने अधिकारबाट वन्चित गरिएको जस्ता आरोप लगाएकी छिन् । आफु अन्यायमा परे पनि आफ्नो पक्षमा प्रहरी, प्रशासनले सहयोग नगरेको उनको गुनासो छ ।
प्रहरीले मुद्धा दर्ता नगरे पछि कान्छी पत्नी रावलले राष्ट्यि मानव अधिकार आयोग, महिला आयोग लगायतका निकायमा मुद्धा दर्ता गराई पाउनका लागि उजुरी दिएकी थिईन् । सोही उजुरीका आधारमा राष्ट्यि मानवअधिकार आयोगले समेत यो विषयमा विशेष चासो दिएको छ । आयोगबाट कपिलवस्तु प्रहरीलाई सोधपुछ गरेको र सोको जवाफ आफुहरुले आयोगलाई पठाई सकेको प्रहरी नायब उपरीक्षक मिन बहादुर घलेले बताए ।
न्यायाधीश गिरीले भने आफु माथि कान्छी पत्नी रावलले नेपालगंजमा ३ तल्ले नयां घर निर्माण गरिदिनु पर्ने, आफुलाई सन्तान चाहिने, अदालतबाट प्रक्रिया मिलाएर भान्छेको तलबको रुपमा मासिक २५ हजार रुपैया उपलब्ध गराईदिनु पर्ने र जेठी पत्नीको घरमा पनि आफु नियमित रुपमा आउजाउ गर्न पाउनु पर्ने माग अघि सारे पछि सो सवै माग मैले पुरा गर्न नसक्ने भए पछि उनी म विरुद्धको उजुरी लिएर प्रहरीमा गएकी बताए ।
अन्य मागको व्यवस्थापन गर्न सके पनि मेरो तर्फबाट उनलाई सन्तान दिन मैले सक्दिन, न्यायाधीश गिरीले भने, यस अघि २०७६ मंसीर ४ गते कैलाली प्रहरीमा उनले म विरुद्ध बलात्कार तथा भ्रुण हत्याको मुद्धा दर्ता गराएकी थिईन् । केही आफ्ना मागहरुलाई पुरा गराउन उनले म विरुद्ध मुद्धा दर्ता गराईन् । आपसी छलफल पछि सो मुद्धा फिर्ता लिई तामेलीमै राखिएको छ ।” म माथि यति ठुलो गम्भीर आरोप लगाए पछि भोलिका दिनमा फेरी अरुको भु्रण लिएर तेरो सन्तान हो भन्दै आउन सक्ने डरले मैले २०७६ चैत्र महिनामा परिवार नियोजन गराए, न्यायाधीश गरिले भने । आफ्नो पद र मर्यादाका कारण आज सम्म उनले जे जे भन्दै गईन् पुरा गर्दै गए, तर अहिले आएर हुदै नभएको जघन्य आरोप लगाएका कारण अब म उनको आरोप विरुद्ध प्रतिवाद गर्न उभिएको छु, न्यायाधीश गिरीले भने ।
शारिरिक वन्धक तथा यौन शोषणको घटना भए नभएको यकिन भए पछि मात्र प्रहरी मुद्धा दर्ता गर्ने नगर्ने टुंगोमा पुग्ने प्रहरी नायब उपरीक्षक मिन बहादुर घलेले बताए । पारिवारिक घटना भएका कारण यसलाई विशेष सुक्ष्म ढंगबाट अनुसन्धान शुरु गरिसकेको छौं, प्रहरी नायब उपरीक्षक घलेले भने ।
कान्छी पत्नी रावलले आफु विरुद्धको उजुरी लिएर प्रहरी तथा संचारकर्मीहरु समक्ष धाउन लागे पछि केही दिनका लागि न्यायाधीश गिरी भने विदा लिएर आफ्नो गृह जिल्ला बांके बसेका छन् । विक्षिप्त मन मस्तिष्कबाट अदालती कामकाज गर्न असहज हुने कारणले मानसिक तनाव कम गर्नका लागि आफु विदामा बसेको उनले बताए । कान्छी पत्नी रावलबाट आफु पटक पटक बार्गेनिंगको शिकार हुदै आए पनि यस पटक भने आफु आर कि पारको लडाईमा रहेको न्यायाधीश गिरीले बताए । मैले यस अघि नै उनि विरुद्ध सम्वन्ध विच्छेदको मुद्धा जिल्ला अदालत बांकेमा दिएको छु । अब कानुन सम्मत ढंगबाट उनीबाट आफु अलग रहेने उनले बताए ।
यता जिल्ला प्रहरी कार्यालय कपिलवस्तुले शरिर वन्धक तथा यौन शोषण भएको यथेष्ट प्रमाण तथा नभएका कारण तत्काल मुद्धा दर्ता गरेको छैन । यो नितान्त पारिवारिक कलह हो, यसलाई पारिवारिक हिसाबमै समाधान गर्दा राम्रो हुने एक प्रहरी अधिकारीले बताए ।
राष्ट्रिय मानव अधिकार आयोग, न्यायपरिषद सचिवालय र राष्ट्रिय महिला आयोगले न्यायाधीश गिरीलाई सोधपुछ र अनुसन्धान शुरु गरेको छ ।
