योग्य मानिसलाई राष्ट्रपति चयन गरेर प्रजातन्त्रको गरिमा र विश्वसनीयता बढाउने भन्दा पनि आफूअनुकुलको ब्यक्ति चयन गरेर आफूलाई सूरक्षित तुल्याउने प्रतिष्पर्धामा शक्तिकेन्द्रहरू जुटेका छन् ।
यतिबेला राष्ट्रपति बन्न सबैभन्दा चर्को दबाब शेरबहादुर देउवामाथि परेको छ । देउवालाई राष्ट्रपति बनाइएको अवस्थामा आफूलाई प्राप्त प्रधानमन्त्री पदको आयू बढेर पाँच वर्षसम्म पुग्नसक्ने आशा प्रचण्डमा पलाएको छ । त्यसैले प्रचण्डद्वारा देउवामाथि राष्ट्रपति पद स्वीकार गर्न चर्को दबाब परिरहेको बुझिन्छ । त्यस्तै देउवालाई काङ्ग्रेसको सक्रिय राजनीतिबाट विश्राम दिलाउन चाहने काङ्ग्रेसकै एकथरि नेताहरू पनि देउवालाई राष्ट्रपति पद ग्रहण गर्न ‘आग्रह’ गर्दैछन् । देउवालाई पन्छाएर काङ्ग्रेसमा एकलौटी हालिमुहाली गर्न चाहने महामन्त्रीहरू मात्र होइन देउवाका निकटतम हितैषी उपसभापति पूर्णबहादुर खड्कासमेत देउवालाई राष्ट्रपति बनाउने पक्षमा रहेको बताइन्छ ।
पूर्ण खड्काको सदासयतालाई कतिपयले कार्यवाहक सभापति बन्ने दाउका रूपमा पनि अथ्र्याएका छन् । भनिन्छ, पूर्णबहादुर खड्काले महामन्त्रीद्वय, सभापति र नेता रामचन्द्र पौडेलकाबीच समन्वय र सन्तुलनको काम पनि गरिरहेका छन् । कदाचित देउवाले राष्ट्रपति पद स्वीकार गरे भने कार्यवाहक सभापति बन्ने र चलाउने परिस्थिति खड्काले निर्माण गरेका छन् । पार्टीका महामन्त्रीहरूबाट समेत देउवालाई राष्ट्रपति बन्न दबाब पैदा गरिएको छ । अब पत्नी आरजु राणाको ब्यवस्थापन हुने निश्चित भयो भने देउवाले राष्ट्रपति पद ग्रहण गर्ने विश्वास गरिएको छ ।
ज्ञातब्य छ, देउवा आफ्नी पत्नीलाई काङ्ग्रेसको उपसभापति या महामन्त्रीका रूपमा देख्न चाहन्छन् । तर काङ्ग्रेस विधानले महामन्त्री या उपसभापति पदमा मनोनयनको ब्यवस्था गरेको छैन । त्यसका निम्ति काङ्ग्रेसले आफ्नो विधान नै संशोधन गर्नुपर्ने हुन्छ र विधान संशोधन गर्न महाधिवेशन या विधान अधिवेशन गर्नुपर्ने हुन्छ । यस्तो अवस्थामा उपसभापति, महामन्त्रीहरू र प्रचण्ड स्वयम्ले देउवालाई कसरी विश्वासमा लिन सक्दा हुन्, प्रतीक्षाको विषय बनेको छ ।
काङ्ग्रेसमा रामचन्द्र पौडेल, मानबहादुर विश्वकर्मा र कृष्ण सिटौलाको नाम सम्भावित राष्ट्रपतिका रूपमा अगाडि आएको छ । यस अघि मधेशी मूलका ब्यक्ति राष्ट्रपति र उपराष्ट्रपति बनिसकेका, महिला, जनजाति र क्षेत्री समुदायबाट पनि राष्ट्रपति र उपराष्ट्रपति भैसकेकाले अब पिछडिएको समुदायका मानिसलाई राष्ट्रपति बनाइनुपर्छ भन्ने आवाज काङ्ग्रेस भित्र पनि जोडतोडका साथ उठ्न थालेको छ । मुलुकको जनसङ्ख्याको ठूलो हिस्सा ओगट्ने दलित समुदायबाट राष्ट्रपति बनाइदा त्यसले छुट्टै सन्देश दिने विश्वास गरिन्छ । यस्तो धारणा राख्नेहरूले अमृत साइन्स क्याम्पसमा गणित विषयका उपप्राध्यापक रहिसकेका पूर्व मन्त्री मानबहादुर विश्वकर्माको नाम अगाडी सारेका छन । काकताली परेको अवस्थामा भने सिटौला या रामचन्द्र पौडेल पनि राष्ट्रपति बन्ने सम्भावनालाई इन्कार गर्न सकिँदैन ।-घटना र विचारबाट
