कपिलवस्तु, कात्तिक ९। कपिलवस्तुमा भारतबाट भन्सार छली गरी नेपाल भित्र्याइएका मोटरसाइकलसहित विभिन्न किसिमका सामान प्रहरीले बरामद गरेको छ।
जिल्ला प्रहरी कार्यालय कपिलवस्तुका अनुसार कात्तिक ६ गतेदेखि ९ गतेसम्म लुम्बिनी प्रदेश प्रहरी कार्यालय दाङ, जिल्ला प्रहरी कार्यालय कपिलवस्तु तथा मातहतका प्रहरी इकाइबाट खटिएको टोलीले जिल्लाका विभिन्न स्थानबाट अवैध रूपमा भित्र्याइएका सामान बरामद गरेको हो।
प्रहरीले सार्वजनिक गरेको प्रेस विज्ञप्तिअनुसार बरामद गरिएका सामानमा मोटरसाइकल, चिनी, खुर्सानी, किराना सामग्री, स्याउ, चियापत्ती, मसला, मञ्जन, कस्मेटिक सामग्री, मोबिल तथा काठका लिस्टीलगायत छन्। यस क्रममा रोयल इन्फिल्ड क्लासिक ३५० सहित विभिन्न मोटरसाइकलसमेत बरामद गरिएको छ।
प्रहरीले विजयनगर गाउँपालिका–४ शंकरपुर क्षेत्रबाट बरामद गरेको पटका (आतिसबाजी) भने नष्ट गरिएको जनाएको छ। अन्य बरामद सामान आवश्यक कारबाही तथा भन्सार प्रक्रियाका लागि कृष्णनगर भन्सार कार्यालय र सुठौली भन्सार कार्यालय कपिलवस्तुमा पठाइएको जिल्ला प्रहरी कार्यालयले जनाएको छ।
प्रहरीको प्रेस विज्ञप्तिमा बरामद गरिएका सामानको कुल अनुमानित बजार मूल्य ८ लाख १३ हजार ४६१ रुपैयाँ उल्लेख गरिएको छ।
सीमावर्ती जिल्लाका विभिन्न नाकाबाट हुने भन्सार छली तथा अवैध सामान ओसारपसार नियन्त्रण गर्ने उद्देश्यले प्रहरीले निगरानी र कारबाहीलाई निरन्तरता दिँदै आएको छ। भन्सार छलीबाट हुने राजस्व चुहावट नियन्त्रण गर्न सीमा क्षेत्रमा प्रभावकारी अनुगमन आवश्यक देखिन्छ।
जिल्ला प्रहरी कार्यालय कपिलवस्तुले अवैध रूपमा सामान ओसारपसार गर्ने गतिविधिविरुद्ध निगरानी तथा कारबाही जारी राखेको जनाएको छ।
photo- AI
