सत्ता गठबन्धनले राष्ट्रिय स्वतन्त्र पार्टीले सरकारलाई दिएको समर्थन फिर्ता लिए पनि प्रधानमन्त्री पुष्पकमल दाहाल ‘प्रचण्ड’ले सदनमा विश्वासको मत लिनु नपर्ने निष्कर्ष निकालेको छ।
शनिबार प्रधानमन्त्रीको सरकारी निवास बालुवाटारमा बसेको सत्ता गठबन्धनको बैठकपछि सञ्चारकर्मीहरुसँग बोल्दै नेकपा माओवादी केन्द्रका प्रमुख सचेतक हितराज पाण्डेले प्रधानमन्त्रीले विश्वासको मत लिनुपर्ने अवस्था नरहेको बताएका हुन्।
उनले भने, ‘सत्ता गठबन्धनका दलका शीर्ष नेताको बैठक थियो। भोलिबाट संघीय संसदको बैठक चल्दैछ। त्यसलाई कसरी व्यवस्थित बनाउने भन्नेबारेमा छलफल भयो। भोलिको बैठकमा नै सरकारका सिद्धान्त र प्राथमिकता प्रश्तुत गर्ने विषय छ। त्यसका बारेमा गठबन्धनको बैठक बसेको हो।
विश्वासको मत लिने आवश्यकता छैन। विषयगत समितिलाई कसरी अघि बढाउने र सर्वोच्चमा प्रधानन्यायाधीशको नियुक्तिलाई कसरी अघि बढाउने भन्नेबारेमा छलफल भयो।’
