कावासोती, वैशाख २५ गते । पूर्वी नवलपरासीको मध्यविन्दु नगरपालिकाले नदीजन्य पदार्थको अवैध उत्खनन् कार्यमा प्रयोग भएका उपकरणहरू नियन्त्रणमा लिएको छ ।
निर्माणाधीन अरुणखोला–मित्याल–रामपुर सडक खण्डमा निर्माण कम्पनीले अवैध रूपमा क्रसर उद्योग सञ्चालन र खोला उत्खनन् गरेको पाएपछि नगरपालिकाले उपकरणहरू नियन्त्रणमा लिएको नगर प्रमुख भीमलाल अधिकारीले बताउनुभयो ।
सङ्घीय सरकार र प्रदेश सरकारको संयुक्त लगानीमा निर्माणाधीन उक्त सडक खण्डको राईकोटमा निर्माण कम्पनी रवण रोजन जेवि चितवनले मोबाइल क्रसर स्थापना गरेको छ ।
क्रसर स्थापना पूर्व कुनै अनुमति नलिएको उक्त ठेक्केदार कम्पनीले स्थानीय खोलाबाट ठूलो परिमाणमा नदीजन्य पदार्थको अवैध उत्खनन् गरेको अनुगमनको क्रममा भेटिएको नगर उपप्रमुख पूर्णकला चौधरीले बताउनुभयो ।
उहाँका अनुसार यस अघि समेत निर्माण कम्पनीका उपकरणहरूले अवैध उत्खनन् गरेको भेटेपछि नगरपालिकाले निर्माण कम्पनीलाई नियमानुसारको राजश्व दाखिला अनुरोध गरेको थियो ।
पटकपटक नगरपालिकाले गरेको अनुरोधलाई बेवास्ता गर्दै निर्माण कम्पनीले अवैध रूपमा क्रसर समेत सञ्चालन थालेपछि नगरपालिकाले अवैध उत्खनन्मा संलग्न दुई वटा एक्स्काभेटर, दुई वटा जेसिभि र एक वटा ट्र्याक्टर नियन्त्रणमा लिएको अनुगमन समितिका सदस्य एवम् मध्यविन्दु १० का वडा अध्यक्ष रणबहादुर थापाले बताउनुभयो ।
निर्माण कम्पनीले सडक निर्माणको क्रममा आवश्यक ग्राभेल, ढुङ्गालगायतको सामग्रीहरू स्थानीय खोलाबाट नै अवैध रूपमा उत्खनन् गर्दै आएको अनुगमन समितिका सदस्यहरूले बताएका छन् ।
निर्माण कम्पनीले राईकोट भन्दा केही उत्तरतर्फ पाल्पाको निस्दी गाउँपालिका जोड्ने जलुके पुल निर्माणस्थल नजिकै सिमेन्टबाट ब्लगहरू उत्पादन गरेर चितवनसम्म निकासी गरेको पाइएको अनुगमन टोली सदस्य नगरपालिकाका अधिकृत विकास नरसिंह राणाले बताउनुभयो ।
मध्यविन्दु नगरपालिकाको अरुणखोलाबाट बतासा हुँदै पाल्पाको मित्याल, रामपुर जोड्ने उक्त सडक राष्ट्रिय सडक अन्तर्गत रहेको पूर्वाधार विकास कार्यालय नवलपरासी पूर्वका निमित्त कार्यालय प्रमुख रवीन्द्र तिवारीले बताउनुभयो ।
यस वर्ष असारसम्म करिब ८ किलोमिटर सडक कालोपत्रे निर्माण सम्पन्न गर्ने गरी निर्माण कम्पनीसँग सम्झौता भएको उहाँले बताउनुभयो । सडक निर्माणको क्रममा ठेक्केदार कम्पनीबाट कुनै कमजोरी भएको भए सो सम्बन्धमा आवश्यक समन्वय गरेर निर्माण कार्यलाई तीव्र बनाउने उहाँले बताउनुभयो ।
निर्माणाधीन सडक सम्पन्न भएपछि अरुणखोलाबाट पाल्पाको रामपुरसहित पूर्वी पाल्पा र मध्यविन्दु नगरपालिकाको वडा नं. १४ हुप्सेकोट गाउँपालिकाको वडा नं. ६ लगायत क्षेत्रका स्थानीयहरूको आवतजावत सहज हुनेछ ।
