सुर्खेत, जेठ १० गते । हावाहुरीका कारण सुर्खेतको पश्चिम क्षेत्रमा ठुलो क्षति भएको छ । सोमबार रातिको भीषण हावाहुरीका कारण सयौँ व्यक्तिको घरमा क्षति पुगेको छ । यस्तै विभिन्न कार्यालयका भौतिक संरचनामा समेत क्षति पुगेको छ ।
पश्चिमका चौकुने गाउँपालिका, पञ्चपुरी नगरपालिका र बराहताल गाउँपालिकामा ठुलो क्षति भएको स्थानीयहरूले बताएका छन् । चौकुने गाउँपालिकाको –८ स्थित भट्टेसरका पहिरो पीडितका १२ वटा घर–टहरामा क्षति भएको छ ।
चौकुनेका अन्य वडामा पनि स्थानीयका घर र कार्यालयका संरचनामा क्षति भएको छ । अहिलेसम्म कति घरधुरीमा क्षति भयो भन्ने यकिन तथ्याङ्क सङ्कलन भइसकेको छैन । चौकुनेमा सञ्चार समस्या भएकाले सबै ठाउँमा सम्पर्क हुन नसकेको कर्मचारीको भनाइ छ । चौकुने गाउँपालिकाका अध्यक्ष खड्ग विकले पालिकाभरि करिब २ सयको हाराहारीमा घरधुरी, कार्यालयको भौतिक संरचनामा क्षति पुगेको बाउनुभयो ।
यस्तै, पञ्चपुरीमा पनि सयौँ घरधुरी र कार्यालयका भवनमा क्षति पुगेको स्थानीयले बताएका छन् । पञ्चपुरी नगरपालिकाका नगरप्रमुख लालवीर भण्डारीका अनुसार पञ्चपुरीको वडा नम्बर ८ को दुललाथाई भन्ने ठाउँमा थुप्रै घरधुरीमा क्षति पुगेको छ । उहाँका अनुसार २९ वटा स्थानीयका घर र एउटा विद्यालयको भवनमा क्षति पुगेको छ ।
यस्तै, बराहताल गाउँपालिका –४ तरङ्गाको श्री सरस्वती आधारभूत विद्यालयको छाना उडाएको छ । क्षति भएका विद्यालयमा पठन–पाठनमा समस्या पुगेको छ भने स्थानीयको घरमा भएको क्षतिका कारण परिवारको बिचल्ली छ । तर, विपद्को समयमा स्थानीय सरकार, प्रदेश सरकार र जिल्ला विपद् शाखाबाट हुनुपर्ने सहयोग स्थानीयले नपाएको गुनासो गरेका छन् ।
राजनीतिक दलका पालिका सङ्गठनहरूले भने भौतिक संरचनामा पुगेको क्षतिका कारण विद्यार्थीको पठनपाठन, हावाहुरीले प्रभावित स्थानीयको खाना, बस्न समेतमा समस्या भएको र समस्या समाधान, क्षतिपुर्तीलगायतमा ध्यान दिन आग्रह गरिरहेका छन् । सुर्खेतका प्रमुख जिल्ला अधिकारी नारायणप्रसाद सापकोटा भने मुचुल्काका लागि प्रहरी खटिसकेको र विवरण सङ्कलन गर्ने काम भइरहेको बताउनुभयो ।
