हुम्ला, जेठ ११ गते । दक्षिणी क्षेत्रको अदानचुली गाउँपालिकाका अध्यक्ष मोहनबिक्रम सिंहले आफ्नो एक वर्ष कार्यकालको प्रगति बिबरण सार्वजनिक गर्नुभएको छ । उहाँले बिहीबार आफ्नो प्रगति बिबरण सार्वजनिक गर्नुभएको हो ।
२०७९ बैशाख ३० गते सम्पन्न भएको स्थानीय तहको निर्वाचनबाट निर्वाचित भएपछि जेठ ६ गतेसम्म एक वर्षमा गरिएका कामलाई बुँदागत रुपमा उहाँले प्रगति बिबरण तयार गर्नुभएको छ । अध्यक्ष सिंहले आफ्नो प्रगतिको पहिलो बुँदामा गाउँपालिकाले एम्बुलेन्स सञ्चालन गरेको विषय उल्लेख गर्नुभएको छ ।
त्यसैगरी उहाँले बिज्ञप्तिमार्फत सार्वजनिक गरेका अन्य प्रगति बिबरणमा गाउँपालिकाको सबै आर्थिक कारोवार बिधुतीय प्रणालीमार्फत हुनु, गाउँपालिकाका छ वटै वडालाई सडक सञ्जालसँग जोड्नु र वडा नम्बर ६ को सडकलाई स्तरोन्नति गरिनु, नेपाल टेलिकमको फोर जी सेवा सुचार गरिनु, काँखे र कल्खे प्राविका लागि भवन निर्माण गर्न बजेटको ब्यवस्था गरिएको, कैलाशपुरी र सल्लाघारी मावि, हिमालचुली निमाविका लागि अनुदानको शिक्षकको ब्यवस्था गरिनु, कैलाश पुरी माविका आरसीसी भवन निर्माणका लागि भारतीय दुतावासबाट बजेटको ब्यवस्थाका लागि पहल गरिएको उल्लेख छ ।
बिश्व बैंकको आर्थिक सहयोगमा गाउँपालिका केन्द्र जोड्ने गल्फागाडदेखि डाँडाकाट्नासम्मको १४ दशमलव दुई किलोमिटर सडकको कालोपत्रे गराउने कार्यको सुरुवात हुनु रहेको छ । अन्य प्रगतिहरुमा लौठी कालागाड, पाल्स काँखे हुँदै वारीगाउँ कालागाड र लौठी हुँदै रिल्म बिगोटी सडकको निर्माण कार्यलाई तिब्रता दिनु, वडा नम्बर १ देखि ३ सम्मका घरधुरीलाई एक घर एक धाराको अवधारणलाई स्थापित गर्न श्रीगनर बृहद खानेपानी आयोजनाका लागि बजेटको ब्यवस्था र निर्माण कार्य सुरु, महिला, दलित, अपाङ्गता, बित्पन्नका लागि लक्षित कार्यक्रम सञ्चालन गरिनु तथा पुर्वाधार बिकास कार्यक्रमलाई प्राथमिकता दिइएको उल्लेख छ ।
