सिन्धुली । विषालु सर्पले डसेर सिन्धुलीको दुधौली नगरपालिका–१ भलुवाहीमा दाजुभाइको मृत्यु भएको छ । स्थानीय शिक्षक ध्रव निसान पहाडीका अनुसार गणेश पहाडीका छोराहरू १२ वर्षीय गृष पहाडी र ७ वर्षीय कृष पहाडीको मृत्यु भएको हो ।
घटना विवरणअनुसार सोमबार राति सँगै सुतेका छोराहरू मंगलबार बिहान बेहोस अवस्थामा फेला परेपछि तत्काल स्थानीय स्वास्थ्य चौकी लगिएकोमा उपचार हुन नसकेपछि महोत्तरीको गौरवासमा रहेको सर्पदंश उपचार केन्द्र लगिएको थियो ।
सर्पदंश केन्द्रले समेत रिफर गरेपछि जनकपुर लगिएकोमा त्यहाँको अस्पतालले दाजुभाइको नै मृत्यु भएको घोषणा गरेको शिक्षक पहाडीले जानकारी दिए । स्थानीय सञ्चारकर्मी रेखराज दाहालका अनुसार ती बालकहरूलाई बैरी करेतले टोकेको हुनसक्ने अनुमान गरिएको छ ।
सिन्धुली प्रहरीले घटनाको जानकारी आए पनि जनकपुरमा मृत्यु भएकाले यकिन विवरण प्राप्त भइनसकेको जनाएको छ । प्रहरी प्रवक्ता चिरञ्जिवी दाहालले घटनाको विस्तृत जानकारीका लागि प्रहरी चौकी हत्पतेबाट टोली खटिएर घटनास्थलतर्फ गएको बताए ।
