काठमाडौं, साउन ३ गते । पछिल्लो समय डेङ्गु सङ्क्रमितको संख्या बढ्दै गएको छ ।
स्वास्थ्य सेवा विभागअन्तर्गतको इपिडिमियोलोजि तथा रोग नियन्त्रण महाशाखाका अनुसार ६८ जिल्लाबाट दुई हजार ९३० जनामा डेङ्गु पुष्टि भएको छ । एक जनाको मृत्यु भएको छ । सङ्क्रमण बढेसँग सुरक्षाका उपाय अप्नाउन सुझाव दिइएको छ ।
डेङ्गु पुष्टि कोशी प्रदेशमा सबैभन्दा बढी रहेको छ । सोही प्रदेशमा एक हजार ७४६ जनामा डेङ्गु पुष्टि भएको छ ।
त्यसैगरी, बाग्मती प्रदेशमा ४६८ जना, सुदूरपश्चिम प्रदेशमा २७९, गण्डकी प्रदेशमा २६९, लुम्बिनी प्रदेशमा १३४, कर्णली प्रदेशमा १८ र मधेष प्रदेशमा १६ जनामा डेङ्गु पुष्टि भएको छ ।
सङ्क्रमितमध्ये ८२ प्रतिशत डेङ्गु सङ्क्रमित १० जिल्लाबाट रहेका छन् । १० जिल्लाबाट दुई हजार ४११ जनामा डेङगु पुष्टि भएको छ ।
जिल्लाअनुसार सुनसरी एक हजार ५७१, धार्दिङ २५८, दार्चुला १८८, कास्की १५९,संशुवासभा ५८, काठमाडौं ४६, कञ्चनपुरबाट ३९,भक्तपुर ३५,म्याग्दीबाट ३५ झापाबाट ३२ जनामा डेङ्गु पुष्टि भएको छ ।
स्वास्थ्य तथा जनसंख्या मन्त्रालयले हरेक शुक्रबार बिहान साढे १० बजे सबै कर्मचारी सहभागी भई सरकारी तथा सार्वजनिक कार्यालय हालभित्र र वरपर सरसफाइ अभियान सञ्चालन गर्न निर्देशन दिएको छ ।
चिकित्सकका अनुसार डेंगुको ज्वरो एडिस जातको पोथी लामखुट्टेको टोकाइबाट सर्ने एक प्रकारको सरुवा रोग हो ।
ज्वरो आउने, मांसपेशी दुख्नु, आँखाको गेडी दुख्नु, टाउको दुख्नु, शरीरमा रातो बिमिरा आउनु, वाकवाकी लाग्नु, वान्ता हुनु डेंगुका प्रमुख लक्षण हुन् ।
चिकित्सकका अनुसार डेङ्गु सङ्मणबाट बच्ने एक मात्र उपाय भनेको लामखुट्टेको टोकाइबाट बच्ने रहेको छ ।
त्यसैले लामखुट्टेको टोकाइबाट बच्न सधैँ झुल टाँगेर सुत्ने, खेतबारीमा काम गर्दा लामो बाहुला भएका लुगा लगाउने, घरको झ्याल ढोकामा जाली हाल्ने, सम्भव भएसम्म लामखुट्टे भगाउने धूप वा मलमको प्रयोग गर्ने । घरपालुवा पशुपंक्षी व्यवस्थित ढंगले पाल्ने, घर वरिपरि गमला,टायर वा कुनै पनि खुल्ला भाँडामा पानी जम्न नदिने ।
