कावासोती, साउन ११ गते । पूर्वी नवलपरासीको कावासोती नगर भित्रका पाउरोटी उद्योगमा अनुगमन गरेको छ । कावासोती नगरपालिकाले तिन दिनसम्म पाउरोटी तथा बेकरी जन्य उत्पादनको अनुगमन गरेको थियो । जसमध्ये कावासोतीमा रहेको लालीगुँरास पाउरोटी उद्योग, रुवी पाउरोटी उद्योग, केएफसी बेकरी, कमल पाउरोटी उद्योग र अनिल पाउरोटी उद्योगको अनुगमन गरिएको थियो ।
अनुगमन गर्ने क्रममा उत्पादन स्थलको सरसफाई नभएको पाइएको छ । साथै दर्ता नभएको, नवीकरण नगरेको, उत्पादन मिति र उपभोग्य मिति उल्लेख नभएको भेटिएपछि तिन वटा पाउरोटी उद्योगको उत्पादन बन्द गरिएको बजार अनुगमन संयोजक मिन लामाले बताउनुभयो ।
उहाँले भन्नुभयो, “कमल पाउरोटी उद्योग, अनिल पाउरोटी उद्योग र लालिगुँरास उद्योगलाई तीनदेखि पाँच दिनका लागि उत्पादन बन्द गरिएको छ ।” नगर भित्र सञ्चालनमा रहेका उद्योग उपभोक्ताले सिधैँ उपभोग गर्ने बस्तुको उत्पादन स्थलमा फोहोर, उत्पादन गर्ने साँचोमा खिया लागेको, झिँगा, दुर्गन्ध, कामदारहरुले सरसफाईमा ध्यान नदिएको पाइएको छ । सरसफाईमा ध्यान नदिएको पाइएपछि पाँच दन सम्मका लागि उत्पादन बन्द गरिएको उहाँले बताउनुभयो ।
अनुगमनका क्रममा पकाउन तयारी अवस्थामा रहेको १५० केजी मैदा, तयारी अवस्थाका उत्पादन २६ ट्रे, लेवल नलगाएको, म्याद गुजे्रको विष्कुट, पाउरोटी २९८ प्याकेट, ६ बोरो विभिन्न उत्पादन बरामद गरिएको संयोजक लामाले बताउनुभयो ।
उपभोक्ताको स्वास्थ्यसँग जोडिएको हुँदा खाद्य पदार्थहरु बिक्री वितरण गर्ने संघसस्थाले जनस्वास्थ्यलाई ध्यान दिएर मात्रै व्यपार व्यवसाय गर्न नगर प्रमुख विष्णु भुषालले आग्रह गर्नुभयो । बजार अनुगमन शाखाले गरेको अनुगमनमा जिल्ला प्रशासन, पर्यटन तथा घरेलु उद्योग, उपभोक्ता हकहित संरक्षण मञ्ज, उद्योग वाणिज्य संघ, जिल्ला प्रहरी लगायतको सहभागिता रहेको थियो ।
नगरपालिकाले अनुगमनका क्रममा बरामत गरेको अखाद्य बस्तुहरुलाई नष्ट गरेको छ । वडा नम्बर ३ को केरुङ्गेखोला नजिकैको च्यानघारीमा बरामत गरिएका अखाद्य बस्तुहरुलाई खाल्डो खनेर पुरिएको छ । नगरपालिकाले केहि दिन देखि नियमित रुपमा अनुगमन जारी राखेको छ ।
