कपिलबस्तु, कात्तिक २१ गते । कपिलबस्तुको तौलिहवामा महेन्द्र गेटको झल्को दिने गरी प्राचीन कपिलबस्तु दरबार स्वागतद्वारको निर्माण सुरु गरिएको छ । तत्कालीन राजा महेन्द्र शाहको भ्रमणको क्रममा बिक्रम संबत २०१५ सालमा कृषि विकास बंैक अघि निर्माण गरिएको महेन्द्र स्वागतद्वार २ बर्ष अघि हु्लाकी राजमार्ग विस्तारको क्रममा भत्काइएको थियो ।
सो लगत्तै कपिलवस्तुबासीको माग अनुसार अहिले त्यही गेटको झल्को दिने गरी स्वागद्वाराको कपिलवस्तु नगरपालिकाका नगर प्रमुख सुदीप पौडेलले शिलान्यास गर्नु भएको छ । अहिले कपिलवस्तु नगरपालिको अगाडी दुई मेडियनको बिचमा हुने गरी द्वारको निर्माण कार्य अघि बढाइएको हो । हुलाकी सडक अन्तर्गत नगरको वडा नम्बर २ र ३ छुने प्रवेश गेटलाई हुलाकी सडकको दुई मेडियनहरुका बिचमा पिलर निर्माण गरिने छ ।
गेटका दुई पिलर बिचको चौडाई १० मिटरको रहने छ । २ मिटर गहिराईको पिलरमा निर्माण हुने गेटको दुबै तर्फ ५ दशमलब ७० सेन्टिमिटर र बिचमा ८ दशमलव ६२ मिटरको उचाई दिई पुरानै महेन्द्र गेट झै देखिने गरि निर्माण कार्य अगाडी बढाईने कपिलवस्तु नगरपालिकाका ईन्जिनियर राजेश कुमार सैनीले बताउनुभयो ।
निर्माण सम्पन्न गर्नका लागी ४४ लाख ५६ हजार ७ सय ३७ रुपैया रकममा २०८० असार १५ गते सम्झौता गरिएको निर्माण कार्य यहि मंसिर १५ गते सम्म पुरा गर्नु पर्ने समय सिमा तोकिएको छ । गेट निर्माण कार्यको ठेक्का खाडाचक्र १ कालिकोटको निर्माण व्यवसायी कम्पनी सन्देश निर्माण सेवाले पाएको छ । कपिलवस्तुको चिनारी र जिल्लाबासी कै माग अनुसार ईतिहासलाई जिवन्त राख्न पुरानै स्वरुपमा गेट निर्माण थालिएको नगर प्रमुख पौडेलले बताउनुभयो । यद्यपि महेन्द्र गेटको नाम परिवर्तन गरी प्राचिन कपिलवस्तु दरबार स्वागद्वारा राखिने उहाँले बताउनुभयो । उहाँले भन्नुभयो ‘महेन्द्रगेटको झल्को अझै पनि सबैमो मानसपलटमा छ, त्यही कुरा जीवन्त राख्न गेट निर्माण सुरु गरिएको हो ।’
सो कार्यक्रममा प्रमुख प्रशासकिय अधिकृत गणेश प्रसाद अर्याल, वडा नम्बर १ का वडाध्यक्ष मोहम्मद जाहिद खा, ३ का वडाध्यक्ष प्रकाश गैरे, ४ का वडाध्यक्ष रबिन्द्र प्रताप तिवारी, ५ का वडाध्यक्ष दिरेप कुमार चौधरी, ९ का वडाध्यक्ष दिपक गुरुङ र ११ का वडाध्यक्ष राम गोपाल यादव लगायतको सहभागीता रहेको थियो ।
