तिलौराकोटलाई राष्ट्रिय गौरवको योजनामा समाबेश गरी विश्व सम्पदा सूचीमा सूचीकृत गरिने ः मन्त्री किराती

कपिलबस्तु, मंसिर ८ गते । संस्कृति, पर्यटन तथा नागरिक उड्डयन मन्त्री सुदन किरातीले तिलौराकोटलाई राष्ट्रिय गौरवको योजनामा समाबेश गरी विश्व सम्पदा सूचीमा सूचीकृत गरिने बताउनु भएको छ । मन्त्री किरातीले राजा शुद्धोधनको राज दरवार एवम् बुद्धले आफ्नो जीवनको २९ वर्ष विताएको ठाँउ प्राचीन तिलौराकोट निरीक्षण गर्ने क्रममा सो कुरा उहाँले बताउनुभएको हो ।
राज्यले तिलौराकोटलाई गौरवको योजना बनाएर विश्व सम्पदा सूचीमा सूचीकृत गर्न अग्रसर रहेको मन्त्री किरातीले बताउनुभयो । उहाँले भन्नुभयो ‘ यस ठाँउले विश्व सम्पदा सूचीमा सूचीकृत गर्न तिब्र रुपमा पहल गरिरहेका छौं ।’ तिलौराकोटलाई राष्ट्रको गौरव, इतिहास र संस्कृतिको संरक्षणका साथै बातारणको संरक्षण गर्ने उहाँको भनाई छ । उहाँले जमिन मुनि रहेको संरचनालाई उत्खनन र प्रमाणिकरण गर्न विश्व सम्पदा सूचीमा सूचीकृत गर्न समय लागेको बताउनुभयो ।
प्राचीन तिलौराकोटलाई विश्व सम्पदा सूचीमा सूचीकृत गर्नका लागि अन्तिम चरणको मनोनयन दस्ताबेज पेस गर्ने तयारी भइरहेको छ । यस अघि पहिलो चरणको प्रस्तावित मनोनयन दस्ताबेज विश्व सम्पदा केन्द्रमा सूचीकृत गर्ने प्रक्रिया अनुसार गत सेप्टेम्बरमा युनेस्को विश्व सम्पदा केन्द्रमा पेस गरिएको थियो । निरिक्षणको क्रममा तिलौराकोटमा राष्ट्रिय तथा अन्तर्राष्ट्रिय विज्ञहरुको समेत सहभागिता रहेको थियो ।