साझा न्यूज । तौलिहवा
रोयल थाई मोनाष्ट्री लुम्विनी, स्वर्णभूमि फाउण्डेशन नेपाल तथा वाटथाई निग्रोधाराम र लायन्स क्लब प्राचीन कपिलवस्तुको सहयोगमा कपिलवस्तु नगरपालिका वडा नं. २ वर्दहवामा खानेपानी ट्यांकी निर्माण गरिएको छ ।
कपिलवस्तु नगरपालिकाका नगर प्रमुख सुदी पौडेल र मोनाष्ट्रीका प्रमुख भिक्षु सुपोतले ट्यांकीको धारा खोलेर खानेपानी संचालन गरी ट्यांकीको उद्घाटन गरेका थिए । सो लगत्तै विद्यार्थीहरुले धाराको पानी पिउन शुरु गरेका छन् ।
सो अवसरमा मोनाष्ट्रीका प्रमुख भिक्षु सुपोतले बिद्यालयमा थप सहयोग गर्न आफु तत्पर रहेको बताए । शिक्षामा गरेको लगानी कुनैपनि हालतमा खेर नजाने बताउँदै भिक्षु सुपोतले भने, “अव सना साना बालबालिकाका लागि पिउने पानीको सहजता भयो ।” हामी निकै खुशी छौं ।
कपिलवस्तु नगरपालिकाका नगर प्रमुख सुदीप पौडेलले नगरपालिकाले सहजै गर्न नसकेको काम रोयल थाई मोनाष्ट्रीले विद्यालयमा खानेपानी व्यवस्थापन गरेको प्रति आभार प्रकट गरेका छन् । शिक्षा तथा स्वास्थ्यका क्षेत्रमा नगरपालिकाले योजनाबद्ध रुपमा काम गरेको बताउँदै उनले बिद्यालयका ससाना योजनाका लागि समेत आफुले ध्यान दिइरहेको उल्लेख गरे ।
कपिलवस्तु नगरपालिका क्षेत्रमा माध्यमिक तह सम्मको कक्षा निशुल्क गराई नगरपालिकाबाट विद्यालयहरुलाई थप शैक्षिक अनुदान प्रदान गर्दै आएको नगरपालिकाका नगर प्रमुख पौडेलले बताए ।
अति विपन्न तथा ग्रामीण क्षेत्रका बालबालिकाहरु अध्ययन गर्ने यस विद्यालयमा खानेपानीको सहज व्यवस्थापनले विद्यालयलाई ठुलो सहयोग पुगेको विद्यालय व्यवस्थापन समितिका अध्यक्ष मुख्तार अहमद खांले बताए । सो अवसरमा अध्यक्ष खांले भिक्षु सुपोत र नगर प्रमुख पौडेललाई मायाको चिनो हस्तान्तरण गरेका थिए ।
कार्यक्रममा थाई एम्बेस्सीका प्रतिनिधी, स्थानीय समाजसेवी राजन खड्का, गंगा बहादुर बिष्ट, बिद्यालय ब्यवस्थापन समितीका सदस्यहरु लगायतलाई समेत आयोजकले सम्मान गरेको थियो ।
कार्यक्रमका संयोजक लुम्बिनी बिकास कोषका निवर्तमान सदस्य राजेश ज्ञवालीले सामाजिक क्षेत्रमा लगानीको आवश्यकता रहेको बताए । स्थानीय सरकारले समेत सामाजिक कार्यमा चाँसोका साथ हेर्नुपर्ने बताउँदै गौतमबुद्ध आधारभूत बिद्यालयलाई निरन्तर सहयोगको वातावरण मिलाउने ज्ञवालीले बताए ।
बिद्यालयका प्रधानाध्यापक सुजाता सुवालले खानेपानी टयांकी निर्माणका लागि खटिने सबैप्रति धन्यवाद प्रकट गरिन् । ट्यांकी निर्माण पश्चात बिद्यालयमा खानेपानीको सहज सुविधा भएको समेत उनको भनाइ छ ।
