साझा न्यूज । कपिलवस्तु
महा शिवरात्रीका अवसरमा कपिलवस्तुको सदरमुकाम तौलिहवामा रहेको ताम्रेश्वर महादेवको मंदीरमा पुजाआजाका लागि भक्तजनहरुको विहानै देखि घुईचो लागेको छ ।
मंदीर परिसरका हजारौ भक्तजनहरुले आज विहान ४ बजे देखि नै ताम्रेश्वर महादेवको पुजा तथा भजन किर्तन गरेका छन् ।
विक्रम सम्वत् १८७२ सालमा स्थापित यो मन्दिर २ सय वर्ष पुरानो मन्दिर हो । भक्तजनहरुको भीड व्यवस्थापनका लागि ठुलो संख्यामा नेपाल प्रहरी र शशस्त्र प्रहरीका सुरक्षाकर्मीहरु खटिएका छन् ।
तत्कालीन अवस्थामा काठबाट निर्मित यो मन्दिर विक्रम सम्वत् १९२८ सालमा आगलागीबाट क्षति भए पछि १९३० सालमा पुर्ननिर्माण भएको थियो ।
मंदीर भित्र रहेको शिवलिंग सम्भवत नेपालकै ठुलो शिवलिंग रहेको मन्दिर व्यवस्थापन समितिका अध्यक्ष राम कुमार गुप्ताले दावी गरे ।
मंदीरमा कपिलवस्तु, रुपन्देही, अर्घाखांची तथा भारतको सिद्र्धाथनगर र बलरामपुर जिल्लाका भक्तजनहरु समेत हजारौको संख्यामा हरेक वर्ष पुजा आजाका लागि आउने गर्छन् ।
जिल्ला आयुर्वेद अस्पताल, नेपाल प्रहरी श्रीमती संघ, सामुदायिक सेवा केन्द्र लगायतका संघ संस्थाहरुले मन्दिर परिसरमा स्वास्थ्य शिविर, प्रसाद वितरण लगायतका कार्यक्रमहरु संचालन गरेका छन् ।
भक्तजनहरुको भीडभाडको फाईदा उठाउंदै महिलाहरुको गहना तथा पुरुषहरुको पाकेट मार्ने जस्ता चोरीजन्य अपराधका घटनाहरु घटन नदिन मन्दिर परिसरमा सादा पोशाकका प्रहरीहरुको समेत परिचालन गरिएको प्रहरी उपरीक्षक नवरत्न पौडेलले बताए ।
मंदीर परिसरमा साधु सन्त तथा भक्तजनहरुले भजन किर्तनगरी शिवआराधाना गरिरहेका छन् । मन्दिर बाहिरको बजारमा स्थानीय मेला समेत लागेको छ । यसै तौलेश्वरनाथ महादेव मंदीरको नामबाट जिल्ला सदरमुकामको नामाकरण तौलिहवा रहन गएको छ ।
शिवरात्रीका अवसरमा लुम्विनी प्रदेश सभाका सदस्यहरु सुधाकर पाण्डेय र मधुसुदन शरण चौधरी, कपिलवस्तु नगरपालिकाका नगर प्रमुख सुदीप पौडेल, पुर्वमन्त्री सुषमा यादव लगायतले ताम्रेश्वर महादेव मन्दिरमा पुजाआजा सम्पन्न गरेका छन् ।
कपिलवस्तुको शिवगढी मन्दिरमा समेत ठुलो मेला लागेको छ । वाणगंगा नगरपालिकाको भड्सडवामा पुर्व मन्त्री दीपकुमार उपाध्यायले निर्माण गर्नु भएको शिवमन्दिरमा समेत भक्तजनको पुजाआजाका लागि ठुलो भीड लागेको छ ।
