साझा न्यूज । कृष्णनगर
कपिलवस्तु, १८ भदौ । कृष्णनगर सीमा नाकाबाट लागू औषध चरेस भारत तर्फ ओसारपोसार गर्न लागेको आरोपमा प्रहरीले २ जनालाई पक्राउ गरेको छ ।
पक्राउ पर्नेहरुमा रुकुम पश्चिम जिल्ला वाफिकोट गाउंपालिका वडा नं. ७ मकामा बस्ने ४० वर्षीय भिमसेन खत्री र रुकुम जिल्ला साविक कोल गाविस वडा नं. ५ घर भई हाल कपिलवस्तु जिल्ला शिवराज नगरपालिका वडा नं. १ चैनपुर नौडिहवा बस्ने ६४ वर्षीय कलिसरा पुन रहेको प्रहरीले जनाएको छ ।
पक्राउ परेका दुवै जना हाल ईलाका प्रहरी कार्यालय कृष्णनगरको नियन्त्रणमा रहेको प्रहरी नायब उपरीक्षक हरि बहादु वलीले बताए ।
सीमा नाकाको कृष्णनगर नगरपालिका वडा नं. २ यात्रु गेट स्थित नेपालबाट भारत तर्फ जांदै गरेकी कलिसरा पुनलाई प्रहरीले रोकी चेक जांच गर्दा निजले बोकेको झोलामा १ किलो ४ सय ४६ ग्राम लागू औषध चरेस जस्तो देखिने कालो गिलो पदार्थ भेटिएको प्रहरीले जनाएको छ ।
पक्राउ परेकी कलिसराको बयान अनुसार सो लागू औषध लिन भारतबाट एक जना पुरुष व्यक्ति आउंदै गरेको थहा भयो । सोही आधारमा प्रहरीले कृष्णनगर बसपार्कबाट भिमसेन खत्रीलाई प्रक्राउ गर्यो ।
पक्राउ परेका खत्रीको साथबाट १ लाख १० हजार भारतीय रुपैया फेला परेको ईलाका प्रहरी कार्यालय कृष्णनगरका प्रहरी निरिक्षक सुरज खत्रीले बताए ।
पक्राउ परेका दुवै जनालाई ईलाका प्रहरी कार्यालय कृष्णनगरले लागु औषध ओसार पोसार मुद्धा दर्ता गरी थप अनुसन्धान अघि बढाएको प्रहरी निरिक्षक खत्रीले बताए । उनीहरुलाई जिल्ला अदालतबाट ७ दिन थुनामा राखी अनुसन्धान गर्न प्रहरीले म्याद लिएको छ ।
