कपिलवस्तु, भदौ १२ गते । जिल्लाको कपिलवस्तु नगरपालिका वडा नं. १० तौलिहवा–जितपुर सडक खण्डको पचेहरामा शनिबार साझा ६ बजे बम विष्फोट भएको छ । पचेहरा हाटबजार अगाडि बीच सडकमा अचानक विष्फोट भएको हो ।
जिल्ला प्रहरी कार्यालय कपिलवस्तुका प्रहरी उपरीक्षक निरञ्जन दत्त भट्टका अनुसार के पड्केको भन्ने प्रारम्भिक रूपमा स्पष्ट नभए पनि पहिले नै जमिनमुनी गाडिएको विष्फोटक वस्तु रहेको अनुमान गरिएको बताउनुभयो ।
विष्फोटका कारण कुनै पनि मानवीय तथा भौतिक क्षति भने नभएको उहाँको भनाई छ । विष्फोट भएको सडकमा करिब ४ फिट गहिरो र १० फिट चौडाइको खाल्डो परेको प्रहरीले जनाएको छ । घटनाबारे थप अनुसन्धान भइरहेको र नेपाली सेनालाई समेत जानकारी दिइएको प्रहरीको भनाइ छ ।
