आर्या बचत तथा ऋण सहकारी संस्थाको नयाँ भवनबाट कारोबार सुरु

कपिलवस्तु, असोज ११ गते । आर्या बचत तथा ऋण सहकारी संस्था लिमिटेडले कपिलवस्तु नगरपालिका–१ मा निर्माण गरिएको आफ्नै नवनिर्मित कार्यालय भवनबाट आइतवारदेखि औपचारिक रूपमा कारोबार शुभारम्भ गरेको छ।
उक्त भवनको उद्घाटन कपिलवस्तु नगरपालिकाका नगर प्रमुख सुदिप पौडेलले एक समारोहका बीच गर्नुभएको हो। उद्घाटन समारोहमा बोल्दै नगर प्रमुख पौडेलले सहकारी संस्था स्थानीय आर्थिक विकासको आधारशिला भएको उल्लेख गर्दै भन्नुभयो, “सहकारीहरूले समुदायमा वित्तीय सचेतना, रोजगारी र आत्मनिर्भरता अभिवृद्धिमा महत्वपूर्ण भूमिका खेलेका छन्। आर्या सहकारीको स्थायीत्व र सेवा विस्तारको यो कदम सराहनीय छ।”
समारोहमा संस्थाका अध्यक्ष प्रकाश घिमिरे, शाखा प्रबन्धक शुभम श्रेष्ठ, वडा नं। १ का वडा अध्यक्ष मोहम्मद जाहिद खा, संस्थाका पदाधिकारी, कर्मचारी तथा सेयर सदस्यहरूको उल्लेखनीय उपस्थिति रहेको थियो।
संस्थाका अध्यक्ष घिमिरेले संस्थाको वर्तमान अवस्था र भविष्यका योजनाबारे जानकारी दिँदै भन्नुभयो, “आर्या सहकारीले स्थापना कालदेखि नै पारदर्शिता, सदस्यकेन्द्रित सेवा र दिगो विकासलाई प्राथमिकता दिँदै आएको छ। नयाँ भवनबाट अझ सहज, सुरक्षित र प्रभावकारी सेवा दिने हाम्रो प्रतिबद्धता छ।”
१ हजार ८ सय सेयर सदस्य रहेको संस्थामा ६ करोड लगानी गरेको संस्थाका शाखा प्रबन्धक शुभम श्रेष्ठले बताउनुभयो। संस्थामा २ हजार २ सय ७३ जना बचतकर्ता रहेको उहाँको भनाइ छ।
जसमध्ये ६ वटा संस्थागत सदस्य छन्,
र ४ करोड रुपैयाँभन्दा बढी ऋण लगानी गरिएको छ। संस्थाले निकट भविष्यमा डिजिटल सेवा विस्तार, आर्थिक साक्षरता अभिवृद्धि र सीपमूलक कार्यक्रमहरू सञ्चालन गर्ने योजना समेत अघि सारेको जनाएको छ