कपिलवस्तु । सशस्त्र प्रहरी बलले कपिलवस्तुका विभिन्न सीमावर्ती क्षेत्रबाट पाँच लाख ३२ हजार ६०० रुपैयाँ बराबरका अवैध सामान बरामद गरेको छ ।
सशस्त्र प्रहरी बल, नेपाल नं. २८ गण हेडक्वार्टर कपिलवस्तुबाट खटिएको टोलीले लत्ताकपडा, जुत्ता तथा एक थान मोटरसाइकल बरामद गरेको हो । बरामद गरिएका सामान आवश्यक कारबाहीका लागि सम्बन्धित निकायमा बुझाइएको सशस्त्र प्रहरीले जनाएको छ ।
सशस्त्र प्रहरी उपरीक्षक गोपाल अधिकारीले सीमा क्षेत्रमा हुने अवैध चोरी पैठारी नियन्त्रणका लागि सशस्त्र प्रहरीले निगरानी र गस्तीलाई तीव्रता दिएको बताउनुभयो । उहाँले अवैध रूपमा सामान ओसारपसार गर्ने गतिविधिमाथि निगरानी बढाउँदै त्यस्ता कार्यमा संलग्नलाई नियन्त्रणमा लिने अभियानलाई निरन्तरता दिइएको जानकारी दिनुभयो ।
उहाँका अनुसार सीमा क्षेत्रमा हुने अवैध गतिविधि नियन्त्रण गर्न सुरक्षा सतर्कता बढाइएको छ ।
