कपिलबस्तु । “स्वस्थ, स्वच्छ, स्वतन्त्र मर्यादित पत्रकारिता मैत्री” भन्ने मूल नारासहित प्रेस काउन्सिल नेपालद्वारा आयोजित पत्रकार आचारसंहिता जागरण कार्यक्रम तौलिहवामा सम्पन्न भएको छ ।
सो अवसरमा बोल्दै प्रेस काउसिल नेपालका अध्यक्ष डा. कुमार शर्मा आचार्यले आचारसंहिता पालन भयो भने पत्रकारिता पनि राम्रो हुने बताउनुभयो । पत्रकारितामा आचारसंहिता कडाइका साथ पालना भए मात्र पत्रकारिताको गुणस्तर वृद्धि हुने बताउनुभयो ।
कार्यक्रममा प्रेस काउन्सिलका सदस्य सन्तराम विडारीले समाचार लेख्दा संवेदनशीलता र समानुभूतिको नीति अपनाउन आग्रह गर्नुभयो । “के सोच्नुस् भने यो न्युज तपाईं स्वयंका लागि हो, त्यसरी सोचेर लेख्नुस्,” उहाँको भनाइ थियो ।
त्यस्तै कार्यक्रममा नेपाल पत्रकार महासंघ कपिलबस्तुका संस्थापक अध्यक्ष नारायण प्रसाद पौडेलले पत्रकारिता क्षेत्रलाई टिकाइराख्न आपसी सहकार्य आवश्यक रहेको बताउनुभयो ।
कार्यक्रममा प्रेस काउन्सिल नेपालका सह प्रशासकिय अधिकृत राम शरण बोहोराले आचारसंहिताबारे प्रस्तुतिकरण गर्नु भएको थियो ।
पत्रकार महासंघ कपिलबस्तुका शाखा अध्यक्ष डिलाराम भुसालको अध्यक्षता, उपाध्यक्ष खगप्रसाद चापागाईको स्वागतमा भएको कार्यक्रमको सञ्चालन शाखाका सचिव सनिउल्लाह धोवीले गर्नु भएको थियो । नेपाल पत्रकार महासंघ कपिलवस्तु शाखाको संयोजनमा सम्पन्न कार्यक्रममा प्रेस काउन्सिल नेपालका प्रतिनिधिहरू, सञ्चारकर्मी तथा सरोकारवालाहरूको उल्लेखनीय सहभागिता रहेको थियो ।
