कपिलवस्तु । बाणगंगा नगरपालिका–२ स्थित कपिलवस्तु प्राविधिक प्रतिष्ठानमा एचए र सिएमएलटी विषय अध्ययनरत दोस्रो वर्षका विद्यार्थीहरूका लागि क्लिनिकल अभ्यास अभिमुखीकरण तथा सपथ ग्रहण कार्यक्रम सम्पन्न भएको छ।
कार्यक्रममा प्रतिष्ठानका कार्यकारी निर्देशक तथा निजी प्राविधिक शिक्षालय महासंघका केन्द्रीय अध्यक्ष अरुण कुमार पाण्डेयले प्राविधिक शिक्षाले दक्ष, जिम्मेवार र मानवताप्रति संवेदनशील स्वास्थ्यकर्मी उत्पादन गर्ने उद्देश्य बोकेको बताउनुभयो। उहाँले विद्यार्थीहरूलाई इमान्दारी, अनुशासन र सेवाभावलाई पेशागत जीवनको आधार बनाउन आग्रह गर्नुभयो।
कार्यक्रममा क्लिनिकल अभ्यास स्वास्थ्य शिक्षाको मेरुदण्ड भएको उल्लेख गर्दै व्यवहारिक ज्ञान र पेशागत मर्यादाबाटै दक्ष स्वास्थ्यकर्मी उत्पादन हुनेमा जोड दिइएको थियो। कार्यक्रममा विद्यार्थीहरूले मानवताको सेवामा समर्पित भई मर्यादित चिकित्सा अभ्यास गर्ने सपथ ग्रहण गरेका थिए।
२०५४ सालमा स्थापना भएको कपिलवस्तु प्राविधिक प्रतिष्ठानले एचए, सिएमएलटीसहित विभिन्न प्राविधिक स्वास्थ्य विषयमा अध्ययन–अध्यापन गराउँदै आएको छ।
