लुम्बिनी । प्रथम हिमालय वरपर क्षेत्रीय चलचित्र प्रदर्शनी (रिङ अफ द हिमालयाज फिल्म टुर) नेपालस्थित लुम्बिनी बौद्ध विश्वविद्यालयमा समापन भएको छ । आठ दिनसम्म सञ्चालन भएको यस प्रदर्शनीले चिनियाँ एनिमेशन चलचित्रलाई माध्यम बनाएर नेपालका तीन विश्वविद्यालयमा सभ्यता सभ्यताबीचको सांस्कृतिक संवाद विस्तार गरेको छ ।
त्रिभुवन विश्वविद्यालयमा आयोजित उद्घाटन समारोहमा नेपाली चलचित्र क्षेत्रका चर्चित कलाकार प्रदीप खड्का, कविता नेपाली, प्रदीप शाही, बुद्धि तामाङ, केपी पाठक, विजय बराललगायतको उल्लेखनीय सहभागिता रहेको थियो । सहभागी कलाकारहरूले नेपाल–चीन चलचित्र तथा सांस्कृतिक आदान–प्रदानलाई थप सुदृढ बनाउन यस्ता कार्यक्रम प्रभावकारी हुने धारणा राखेका थिए ।
प्रदर्शनीमा न्यु गड्स: याङ जियान, ह्वाइट स्नेक: ओरिजिन, द लिजेन्ड अफ हेइ २ जस्ता चर्चित चिनियाँ एनिमेशन चलचित्र तथा AIGC प्रविधिमा आधारित एनिमेटेड शृंखला यौ शान लिङ प्रदर्शन गरिएको थियो । परम्परागत चिनियाँ कथावस्तुलाई आधुनिक प्रविधि सीजी थ्रीडी, फिजिकल सिमुलेसन र डायनामिक प्रि भिजुअलाइजेसन मार्फत प्रस्तुत गरिएका यी चलचित्रले दर्शकको ध्यान आकर्षित गरेको थियो ।
कार्यक्रमले चलचित्र प्रदर्शनमा मात्र सीमित नरही ‘प्रदर्शन तथा अन्तरक्रिया’लाई जोड दिएको थियो । चलचित्र प्रदर्शनअघि परिचयात्मक सत्र तथा प्रदर्शनपछि स्रष्टासँगको प्रत्यक्ष अनलाइन संवादमार्फत नेपाली विद्यार्थी र प्राध्यापकहरूले एनिमेशन निर्माणको प्रक्रिया र प्रविधिबारे प्रत्यक्ष जानकारी लिने अवसर पाएका हुन् ।
प्रदर्शनी अवधिभर ह्वाइट स्नेकका योजनाकार तथा एरिजोना स्टेट युनिभर्सिटीका सह प्राध्यापक एलेक्स मा, यौ शान लिङका निर्माता तथा युगुआङ तोङछेनका सह संस्थापक तथा प्रमुख कार्यकारी अधिकृत चेन फालिङ, कार्यकारी निर्माता केली ह्वाङ, wuhu एनिमेशन स्पेसका संस्थापक वाङ सानयाङलगायत चिनियाँ एनिमेशन उद्योगका प्रतिनिधिहरूले अनुभव साझा गरेका थिए ।
त्यसैगरी, पेकिङ विश्वविद्यालयका प्राध्यापक तथा चाङजियाङ स्कलर ली दाओसिनले ‘एआईद्वारा निर्मित डायनामिक एनिमेटेड कथामार्फत हिमालयका कथा’ विषयमा व्याख्यान दिएका थिए । बेइजिङ नर्मल विश्वविद्यालयका प्राध्यापक तथा एसियन फिल्म रिसर्च सेन्टरका कार्यकारी निर्देशक झाङ यानले ‘एआई प्रेरित चलचित्र उद्योगको रूपान्तरण’ विषयमा प्रस्तुतिकरण गरेका थिए ।
