नेपालगन्ज, पुस ८ गते । बाक्लो शीतलहर तथा कुहिरोका कारण भिजिविलिटी नपुग्दा मंगलवार दिउँसोसम्म नेपालगन्ज बिमानस्थलबाट कुनै हवाइ उडान हुन सकेन ।
नागरिक उड्डयन कार्यालय नेपालगन्जका अनुसार मंगलवार विहानैबाट लागेको बाक्लो हुस्सु र कुहिरो तथा चलेको शीत लहरले नेपालगन्ज बिमानस्थल बन्द रहेको हुँदा कुनै पनि हवाइ उडान हुन नसकेको हो ।
हुस्सु र कुहिरोका कारण ४०० देखि ६०० मिटर मात्र भिजिविलेटी हुँदा विमानस्थल बन्द रहेको र सोही कारणले नेपालगन्जबाट पहाडी जिल्ला र काठमाडौंका लागि हुने कुनै पनि उडान मंगलबार दिउँसो १ बजेर ५० मिनेटसम्म नभएको नागरिक उड्डयन कार्यालय नेपालगन्जले जनाएको छ ।
हवाई उडानका लागि आवश्यक पर्ने भिजिविलिटी नहुँदा उडान शुरु गर्न नसकिएको विमानस्थल टावरले जनाएको छ । नेपालगन्ज विमानस्थलको टावरले दिएको जानकारीअनुसार जहाज उडाउन एक हजार भिजिबिलिटी हुनु पर्ने र जहाज उतार्नका लागि एक हजार ६०० भिजिबिलेटी हुनुपर्नेमा मंगलबार दिउँसो एक बजेर ५० मिनेटसम्म ६०० भन्दा बढी भिजिबिलेटी नभएकाले उडान सुरु गर्न नसकिएको हो ।
विमानस्थल बन्द रहेकाले यहाँबाट पहाडि जिल्लाका लागि विहान हुने सबै उडान रद्द गरिएका छन् । काठमाडौंका लागि हुने सबै उडान अवरुद्ध भएका छन् । सोमवार पनि दिउँसो १ बजेर ३० मिनेटपछि मात्र नेपालगन्ज विमानस्थल खुलेपछि हवाई उडान भएका थिए । त्यसअघि विहानका सबै उडान अवरुद्ध भएका थिए ।
नेपालगन्जका लागि काठमाडौंबाट विहान ७ बजेर २० मिनेटमा बुद्ध एअरको जहाज उड्ने नियमित तालिका भए पनि नेपालगन्ज विमानस्थल बन्द रहेका कारण हालसम्म पनि उड्न नसकेको बुद्ध एअर नेपालगन्जका प्रमुख विनित विक्रम शाहले बताउनुभयो ।
उहाँले नेपालगन्ज विमानस्थल खुलेपछि मात्र काठमाडौंबाट जहाज उडाइने जानकारी गराउनुभयो । नेपालगन्जबाट काठमाडौँका लागि श्री एयरलाइन्सले चार, बुद्ध एयरलाइन्सले चार र यति एयरलाइन्सले दुई वटा नियमित उडान गर्दैआएको छ । सोही प्रकारले नेपालगन्जबाट पहाडी जिल्लामा पनि विहान बढी उडान हुने गरेका छन् ।
नेपालगन्जबाट हवाई उडान अवरुद्ध भएपछि काठमाडौ र पहाडी जिल्लामा यात्रा गर्न जाने यात्रुहरु समस्यामा परेका छन् । टिकेट लिएका अधिकांश यात्रुहरु जहाजको प्रतिक्षामा विमानस्थलमा रहेका छन् ।
