नेकपा एमाले रुपन्देही ५ क्षेत्रीय कमिटीले प्रतिनिधि सभामा उम्मेदवारका लागि नेता खिमलाल भट्टराईलाई एकल सिफारिस गरेको छ ।
आज बसेको क्षेत्रीय कमिटीको बैठकले भट्टराईको नाम एकल रूपमा सिफारिस गरेको बैठकमा सहभागी एमाले रुपन्देहीका सचिवालय सदस्य सन्दीप गुप्ताले जानकारी दिए । ‘बैठकमा उहाँको मात्रै नाम प्रस्तावित भयो, सबैले ताली बजाएर स्वीकृत गरे’ उनले भने ।
बैठकमा समन्वय गरेका एमाले केन्द्रीय कमिटी सदस्य भूमिश्वर ढकालले पनि क्षेत्रीय कमिटी बैठकबाट नेता खिमलाल भट्टराईको एकल नाम सिफारिस गरेको जानकारी दिए ।
ययअघि ०७९ को निर्वाचनमा यो क्षेत्रबाट बासुदेव घिमिरेले जितेका थिए । तत्कालीन समयमा एमालेबाट राष्ट्रियसभामा प्रमुख सचेतक रहेका भट्टराई राजीनामा दिएर उम्मेदवारका लागि पुगे पनि त्यो भन्दा अघि नै घिमिरेले उम्मेदवारी दर्ता गराइसकेकाले भट्टराई दुवैतिरबाट बाहिरिएका थिए ।
