देशका विभिन्न जिल्लाबाट ठूलो परिमाणको अवैध लागूऔषध ब्राउनसुगर तथा नियन्त्रित फर्मास्युटिकल औषधिसहित १३ जनालाई प्रहरीले पक्राउ गरेको छ।
काठमाडौं, झापा, पर्सा, कैलाली, लमजुङ, सुनसरी र बर्दियाका विभिन्न स्थानबाट उनीहरूलाई नियन्त्रणमा लिइएको प्रहरीले जनाएको छ।
काठमाडौं महानगरपालिका-६ चुच्चेपाटीबाट करिब ४ ग्राम २५० मिलिग्राम ब्राउनसुगर र २० हजार २०० रूपैयाँ नगदसहित सिन्धुपाल्चोक भोटेकोशी गाउँपालिका-३ घर भई माकलबारी बस्ने ३९ वर्षीय छिरीङ शेर्पालाई प्रहरी वृत्त बौद्धले शुक्रबार राति पक्राउ गरेको छ।
त्यस्तै, महानगरपालिका-३२ जडिबुटीबाट करिब ६ ग्राम ७४० मिलिग्राम ब्राउनसुगरसहित सप्तरी खडक नगरपालिका-१ घर भई इमाडोल बस्ने २३ वर्षीय गौतम चौधरीसहित दुई जनालाई प्रहरी वृत्त नयाँ बानेश्वरको टोलीले पक्राउ गरेको हो।
झापा गाउँपालिका-५ खयरबारीबाट १ ग्राम ९५ मिलिग्राम ब्राउनसुगरसहित बाह्रदशी गाउँपालिकाका २४ वर्षीय खड्ग राजवंशी र २५ वर्षीय चैतन हेमरमलाई प्रहरी चौकी शरणामतिले पक्राउ गरेको छ।
उता पर्साको वीरगंज-१६ बसपार्कबाट डाईजेपाम २७ एम्पुल, फेनारगन २९ एम्पुल र बुप्रेनोर्फिन २८ एम्पुलसहित धादिङ ज्वालामुखी गाउँपालिका-२ घर भएका २० वर्षीय निमा लामा शेर्पा पक्राउ परेका छन्।
धनगढी उपमहानगरपालिका-४ चटकपुरस्थित गोकुलेश्वर चौलानी होटलको कोठा नम्बर १०४ बाट १२७ मिलिग्राम ब्राउनसुगरसहित डोटी जोरायलका २५ वर्षीय अमर बहादुर कुँवर पक्राउ परेका छन्।
यसैगरी भजनी नगरपालिका-३ कुसुमघाटबाट १ ग्राम ५० मिलिग्राम ब्राउनसुगर र लु.प्र.०१-०१५ प ४७८९ नम्बरको मोटरसाइकलसहित टीकापुरका २२ वर्षीय रोशन सार्कीसहित दुई जनालाई प्रहरी चौकी जनकपुरले नियन्त्रणमा लिएको छ।
लमजुङको बेसीशहर-१ देउरालीडाँडाबाट ग.१० प ९९६९ नम्बरको स्कुटरमा सवार ३० वर्षीय सुजन तामाङलाई डाईजेपाम, बुप्रेनोर्फिन र फेनारगन १०/१० एम्पुलसहित इलाका प्रहरी कार्यालय भोटेओडारले पक्राउ गरेको छ।
सुनसरीको कोशी गाउँपालिका-१ लौकहीबाट २ ग्राम १७० मिलिग्राम ब्राउनसुगरसहित दुहवीका ३४ वर्षीय दिपक परियार र उदयपुर बेलकाका ३२ वर्षीय बल बहादुर थापा पक्राउ परेका छन्।
यस्तै, बर्दियाको बढैयाताल-७ कर्णाली पुलबाट २ ग्राम ७१० मिलिग्राम ब्राउनसुगरसहित बाँके कोहलपुरका २१ वर्षीय सुशिल परियारलाई प्रहरी चौकी कालिकाले शनिबार दिउँसो नियन्त्रणमा लिएको छ।
पक्राउ परेका सबैमाथि सम्बन्धित प्रहरी कार्यालयहरूबाट थप अनुसन्धान भइरहेको प्रहरीले जनाएको छ।
