लुम्बिनीमा जैविक विविधता र सिमसार संरक्षणका लागि तेस्रो नेपाल पंछी मेला हुदै

कपिलबस्तु, पुस २३ गते । नेपालका चराप्रजाति, जैविक विविधता र सिमसार संरक्षणका लागि तेस्रो नेपाल पंछी मेला २०२६ लुम्बिनीमा आयोजना हुने भएको छ । पोखरा पंछी समाजको आयोजनामा तथा ग्रिन युथ लुम्बिनीको सह–आयोजनामा माघ १२ र १३ गते लुम्बिनीमा मेला सञ्चालन हुनेछ ।
कार्यक्रमकी प्रमुख अतिथि लुम्बिनी सांस्कृतिक नगरपालिकाकी कार्यवाहक नगरप्रमुख कल्पना हरिजनले चरासंरक्षणलाई जीविकोपार्जन र पर्यटनसँग जोड्नुपर्ने बताउनुभयो । उहाँले युवालाई स्वरोजगार बनाउँदै चरा पर्यटन प्रवद्र्धन गर्न सके लुम्बिनीको दिगो विकास सम्भव हुने धारणा राख्नुभयो ।
मेलाका संयोजक मनशान्त घिमिरेले चरासँगै जैविक विविधता संरक्षणमा जोड दिँदै बन्जारहाटाल र जगदीशपुर तालजस्ता सिमसार क्षेत्र संरक्षणलाई प्राथमिकतामा राख्नुपर्ने बताउनुभयो ।
पंछी मेलाअन्तर्गत बर्ड सिम्पोसियम, सारस तथा भल्चर फोरम, बर्ड रेस, तस्बिर प्रदर्शनीलगायत कार्यक्रम हुनेछन् । नेपालसहित विभिन्न देशका पंछीविद, अनुसन्धानकर्ता र संरक्षणकर्मीको सहभागिता रहनेछ । करिब ३० हजार दर्शकले अवलोकन गर्ने अपेक्षा गरिएको छ ।