कपिलवस्तु, माघ १६ गते । नेपाली कांग्रेस कपिलवस्तु क्षेत्र नं. २ का प्रतिनिधि सभा सदस्यका उम्मेदवार सुरेन्द्रराज आचार्यले महाराजगंज नगरपालिका वडा नं. ४ करहवा गाउँ तथा यशोधरा गाउँपालिका वडा नं. ७ मार्यादपुरमा घरदैलो तथा भेटघाट कार्यक्रम सम्पन्न गर्नुभएको छ।
करहवा गाउँमा आयोजित कार्यक्रममा आचार्यले महिला समूह तथा स्थानीय बासिन्दासँग भलाकुसारी गर्दै जनतासँगको साथ र सहकार्य नै आफ्नो प्रमुख शक्ति भएको बताउनुभयो। उहाँले स्थानीय समस्या, विकासका आवश्यकता तथा जनचासोका विषयमा प्रत्यक्ष रूपमा सुझाव संकलन गरिएको उल्लेख गर्दै समाधानका लागि आफू प्रतिबद्ध रहेको धारणा राख्नुभयो।
कार्यक्रमका क्रममा स्थानीय महिलाहरूले रोजगारी, स्वास्थ्य सेवा, शिक्षा तथा पूर्वाधार विकासलाई प्राथमिकतामा राख्न आग्रह गरेका थिए। आचार्यले ती विषयलाई आफ्नो चुनावी प्रतिबद्धतामा समेटिएको जनाउँदै निर्वाचित भए प्रभावकारी कार्यान्वयनमा जोड दिने बताउनुभयो।
यसैगरी यशोधरा गाउँपालिका वडा नं. ७ मार्यादपुरमा आयोजित भेटघाट कार्यक्रममा पनि उहाँले मतदातासँग छलफल गर्दै लोकतान्त्रिक मूल्य, सुशासन र समावेशी विकासका पक्षमा निरन्तर क्रियाशील रहने प्रतिबद्धता व्यक्त गर्नुभयो। स्थानीयवासीले सडक, सिँचाइ तथा कृषि विकासका विषयमा ध्यानाकर्षण गराएका थिए।
घरदैलो तथा भेटघाट कार्यक्रममा कांग्रेसका जिल्ला सभापति अब्दुल कलाम, वडा अध्यक्ष चन्द्र प्रकाश दुबे, प्रमोद चौधरी, पूर्व वडाध्यक्ष सुशील चौधरी, क्षेत्रीय सचिव परुवालाल यादव लगायत नेता तथा कार्यकर्ताको सहभागिता रहेको थियो।
