नेपालगन्ज, माघ २१ गते । आगामी फागुन २१ गते हुने प्रतिनिधिसभाको निर्वाचनमा समानुपातिकतर्फ मतदान गर्नका लागि बाँकेमा अस्थायी मतदाताको विवरण सङ्कलन गरेर नामावली प्रकाशित गरिएको छ ।
जिल्ला निर्वाचन कार्यालय बाँकेका प्रमुख टेकबहादुर शाहीले बाँके जिल्लामा हालसम्म सङ्कलन गरिएको सङ्ख्या अनुसार दुई हजार ३३८ जना अस्थायी मतदाता रहेको पाइएको र उनीहरूको नामावली प्रकाशित गरिएको बताउनुभयो ।
उहाँले जिल्लामा रहेका सुरक्षाकर्मीहरू, सबै सरकारी कर्मचारी, संस्थानका कर्मचारी, कारागारमा रहेका बाहिरी जिल्लाका कैदी बन्दीहरूको विवरण सङ्कलन गरेर नामावली प्रकाशित बताउनुभयो ।
यसअघि निर्वाचन कार्यालयले विभिन्न निकायसँग अस्थायी मतदाताको सङ्ख्या र नामावली माग गरेको थियो । ती मध्ये जनपद प्रहरीको नामावली अझै प्राप्त नभएकोले नामावली पाप्त भएपछि सो सङ्ख्या वृद्धि हुने जिल्ला निर्वाचन कार्यालय बाँकेले जनाएको छ ।
सो कार्यालयका प्रमुख शाहीका अनुसार अस्थायी मतदाताका लागि कतिवटा र कुन कुन ठाउँमा अस्थायी मतदान केन्द्र राख्ने बारेमा पनि छलफल भइरहेको छ । उहाँले बाँकेमा यस पटक तीन लाख ५० हजार ३७१ जना मतदाता सङ्ख्या पुगेको जनाउँदै निर्वाचनका लागि १३९ मतदान स्थल र ४०० मतदान केन्द्र तोकिएको बताउनुभयो।
जिल्ला सुरक्षा समिति बाँकेका अनुसार जिल्लाका आठ वटा पालिकाहरूमा कायम गरिएका १३९ वटा मतदान स्थलमध्ये ६१ वटा अति संवेदनशील र ५० वटा मतदान स्थललाई संवेदनशील तथा २८ मतदान स्थललाई सामान्य तोकेर सोही बमोजिमको सुरक्षा प्रबन्ध मिलाइँदै छ ।
