पोषण सुधारका लागि बहुक्षेत्रीय सहकार्य अपरिहार्य

तौलिहवा (कपिलवस्तु), माघ २१ गते । बहुक्षेत्रीय पोषण योजना (एमएसएनपी) तेस्रो चरणअन्तर्गत पोषण सुधार कार्यक्रम तथा बजेट व्यवस्थापनसम्बन्धी छलफल तथा अन्तरक्रिया कार्यक्रम कपिलवस्तुमा सम्पन्न भएको छ ।
कार्यक्रममा लुम्बिनी प्रदेशको पोषण अवस्थाबारे प्रदेश योजना आयोगका सचिव खिमबहादुर कुँवरले कार्यपत्र प्रस्तुत गर्नुभएको थियो भने पोषणमैत्री स्थानीय शासनका विषयमा नविन विषीले प्रस्तुति दिनुभएको थियो ।
कार्यक्रममा बोल्दै आयोगका उपाध्यक्ष डा. डिल्लीराज आचार्यले आर्थिक विकाससँगै स्वास्थ्य र दक्ष जनशक्तिको विकास अपरिहार्य रहेको बताउनुभयो । स्वास्थ्य र दक्ष जनशक्ति बिना समृद्धिको लक्ष्य हासिल गर्न नसकिने उल्लेख गर्दै उहाँले प्रदेशले निर्माण गरेको रणनीतिमा सबै सरोकारवालाको सहकार्य आवश्यक रहेको धारणा राख्नुभयो । साथै, स्रोतसाधनको प्राथमिकतासहित विनियोजन गर्नुपर्नेमा उहाँले जोड दिनुभयो ।
त्यसैगरी बुद्धभूमि नगरपालिकाका नगर प्रमुख केशवकुमार श्रेष्ठले सबै तह र क्षेत्रको सहकार्यबिना पोषणसम्बन्धी लक्ष्य हासिल गर्न नसकिने बताउनुभयो । उहाँले कपिलवस्तुका केही स्थानीय तहले खाद्य तथा पोषण रणनीति निर्माण गरिसकेको र केही पालिकामा सो कार्य प्रक्रियामा रहेको जानकारी दिनुभयो ।
प्रमुख जिल्ला अधिकारी जनार्दन गौतमले सामाजिक, कृषि, पशुपन्छी र मानव स्वास्थ्यसँग जोडिएका क्षेत्रलाई आवश्यक महत्व नदिइँदा बालबालिकामा कुपोषणको समस्या देखिएको बताउनुभयो । पोषण सुधारमा स्वास्थ्य, खानेपानी तथा सरसफाइ, कृषि, पशुपन्छी र सुशासन क्षेत्रको महत्वपूर्ण भूमिका रहेको उल्लेख गर्दै उहाँले स्थानीय तहले पूर्वाधार निर्माणमा मात्र केन्द्रित हुने प्रवृत्ति परिवर्तन गर्नुपर्ने धारणा राख्नुभयो । उहाँले पहिलो प्राथमिकता मानिसको स्वास्थ्य हुनुपर्नेमा जोड दिनुभयो ।
नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाईंले पोषणमा सुधार ल्याउन संघ, प्रदेश र स्थानीय तह तीनै तहका सरकारको समन्वित भूमिका आवश्यक रहेको बताउनुभयो । स्वास्थ्य क्षेत्रलाई पहिलो प्राथमिकतामा राखेर नीति तथा कार्यक्रम निर्माण गर्नुपर्ने उहाँको भनाइ थियो ।
कार्यक्रमको अध्यक्षता गर्दै जिल्ला समन्वय समितिका प्रमुख बाबुराम आचार्यले कपिलवस्तु खाद्यको भण्डारका रूपमा परिचित भए पनि यसको सही सदुपयोग नहुँदा पोषणको अवस्था चुनौतीपूर्ण बनेको बताउनुभयो । पोषण सुधारका लागि जनचेतनाको विकास अपरिहार्य रहेको उल्लेख गर्दै उहाँले सरकारले सन् २०३० सम्म पोषणयुक्त समाज निर्माण गर्ने लक्ष्य लिएको जानकारी दिनुभयो ।
कार्यक्रम विएमजेड डब्लु एच एच र कालिका स्वावलम्बन सामाजिक केन्द्र र आर आर एनको आर्थिक सहयोग तथा जिल्ला समन्वय समिति कपिलवस्तुको समन्वयमा लुम्बिनी प्रदेश योजना आयोगको आयोजनामा सम्पन्न भएको हो । कार्यक्रममा विभिन्न स्थानीय तहका प्रमुख तथा उपप्रमुख, प्रमुख प्रशासकीय अधिकृत, गैरसरकारी संस्थाका प्रतिनिधि, लगायतको सहभागिता रहेको थियो ।