कपिलवस्तु । कपिलवस्तु निर्वाचन क्षेत्र नम्बर २ का प्रतिनिधि सभा सदस्यका उम्मेदवार तथा नेपाली कांग्रेसका नेता सुरेन्द्रराज आचार्यले जनताले पाँच वर्षका लागि निर्वाचित गरेको प्रतिनिधि तीन वर्षमै पुनः निर्वाचनमा जानुपर्ने अवस्था राजनीतिक बाध्यताका कारण सिर्जना भएको बताउनुभएको छ।
कपिलवस्तुमा आयोजित कार्यक्रममा बोल्दै आचार्यले मुलुक विषम परिस्थितिमा फसेपछि संसद विघटन हुन पुगेको उल्लेख गर्नुभयो। उहाँका अनुसार यो अवस्था कुनै जनप्रतिनिधिको चाहना वा असक्षमताका कारण नभई समग्र राजनीतिक परिस्थितिको परिणाम हो।
आचार्यले नेपाली कांग्रेस समग्र नेतृत्वमा परिवर्तनसहित निर्वाचनमा होमिएको उल्लेख गर्दै आगामी निर्वाचनपछि गगन थापालाई प्रधानमन्त्रीका रूपमा अगाडि सारेको जानकारी दिनुभयो। उहाँले विकासको दृष्टिले पछि परेका जिल्लाहरूलाई विशेष प्राथमिकताका साथ अघि बढाइने पार्टीको नीति रहेको पनि स्पष्ट पार्नुभयो।
उहाँले विगतका कमी कमजोरीलाई आत्मसात गर्दै पार्टी आगामी दिनमा अझ जिम्मेवार र जनउत्तरदायी ढंगले अघि बढ्ने दाबी गर्नुभयो। लोकतन्त्र र संविधानको रक्षा गर्न नेपाली कांग्रेसको जित आवश्यक रहेको उल्लेख गर्दै आचार्यले आगामी फागुन २१ गते हुने निर्वाचनमा कांग्रेसलाई समर्थन गर्न मतदातासमक्ष आग्रह गर्नुभयो।
पुनः निर्वाचनको संघारमा आइपुग्दा कपिलवस्तु–२ मा राजनीतिक स्थायित्व, नेतृत्व सुधार र विकास प्राथमिकताका विषयलाई आधार बनाएर मतदाताले निर्णय गर्ने अपेक्षा गरिएको छ।
तीन वर्षमै पुनः निर्वाचन राजनीतिक बाध्यता हो : सुरेन्द्रराज आचार्य
