काठमाडौं : पत्रकार विश्वमणि सुवेदीलाई प्रहरीले पक्राउ गरेको छ। नेपाल प्रेसको कार्यालयभित्रै प्रवेश गरेर पत्रकार सुवेदीलाई पक्राउ गरिएको हो।
नेपाल प्रेसका सम्पादक चिरञ्जीवी पौडेलले सादा पोसाकमा आएका प्रहरीले समाचार कक्षमै प्रवेश गरेर पत्रकार सुवेदीलाई पक्राउ गरेको जानकारी दिएका छन्।
‘सादा पोसाकका प्रहरी समाचार कक्षभित्रै प्रवेश गरेर नेपाल प्रेसका पत्रकार विश्वमणि सुवेदीलाई पक्राउ गरेका छन्। पक्राउ पूर्जी दिइएको छैन,’ उनले भनेका छन्।
त्यस्तै नयाँ पत्रिकाको कार्यालय पनि सादा पोसाकका प्रहरी पुगेका छन्। प्रहरीले नयाँ पत्रिकाका पत्रकार नवराज मैनालीलाई खोज्दै त्यहाँ पुगेका छन्।
ती प्रहरीहरूले अपराध अनुसन्धान महाशाखाबाट सन्तोष खड्काको आदेशमा आफूहरू आएको बताएको नयाँ पत्रिकाका पत्रकार यम बमले जानकारी दिएका छन्।
‘अपराध अनुसन्धान महाशाखाबाट सन्तोष खड्काको आदेशमा आएको बताउनेहरू। कार्यालयभित्र ७ जना छन्। अफिस बाहिर गेटमा पनि बसेका छन्,’ उनले भनेका छन्।
नेपाल प्रेसका अनुसार ‘आइजी साब’को आदेशमा उनीहरू समाचार कक्षमै प्रवेश गरेका हुन्। प्रहरी महानिरीक्षकमाथि राजीनामाको दबाबसम्बन्धी समाचारको स्रोत खोज्नका लागि पक्राउ गरिएको नेपाल प्रेसले समाचारमा उल्लेख गरेको छ।
