प्रतिनिधिसभाका सभामुख अग्नीप्रसाद सापकोटाले आज शुक्रबार २ बजेका लागि राख्नुभएको समसामयिक राजनीतिक विषयको छलफलमा प्रधानमन्त्री केपी शर्मा ओली सहभागी नहुने हुनुभएको छ ।
प्रधानमन्त्रीका प्रेस सल्लाहकार सूर्य थापाकाअनुसार प्रधानमन्त्री ओलीलाई सभामुखको तर्फबाट कुनै औपचारिक पत्र र बैठकबारे जानकारी नआएकाले बैठकमा सहभागी हुनुहुने छैन । विभिन्न मिडियाबाट बैठकको समाचारबारे जानकारी प्राप्त भएपनि आधिकारिक पत्र प्राप्त भइनसकेको उहाँले जानकारी दिनुभयो ।
यता, सभामुख सापकोटाका प्रेस विज्ञ श्रीधर न्योपानेले भने औपचारिक पत्र नेकपा (एमाले) पार्टी कार्यालय थापाथलीमा जेठ २६ गते पठाइएको बताउनुभयो । “प्रधानमन्त्री तथा एमाले पार्टी अध्यक्षको हैसियतमा पत्र पठाएका छौं, थापाथली कार्यालयमा पत्र दर्ता भएको छ” उहाँले भन्नुभयो ।
सभामुख सापकोटाले वर्तमान समसामयिक विषयमा छलफल गर्न संसदमा प्रतिनिधित्व रहेका दलका शीर्ष नेता, पूर्व प्रधानमन्त्रीहरुसँग छलफल गर्न लाग्नुभएको प्रेस विज्ञ न्यौपानेले जानकारी दिनुभयो । दिउँसो २ बजे नयाँ बानेश्वरस्थित संसद भवनमा बैठक हुने उहाँले बताउनुभयो ।
