काठमाडौं – निर्वाचन आयोगले कानुन अनुसार नेकपा एमाले दर्ता हुँदाको बखतमा रहेको केन्द्रीय सदस्य संख्याबाट नै माधव नेपाललाई सनाखत गराउने भएको छ । कानुन अनुसार दल दर्ता गर्दाको पार्टीको विधान र त्यस बखत आयोगमा रेकर्ड भएका केन्द्रीय सदस्यको आधारमा अघि बढ्ने आयोगको तयारी रहेको छ ।
नेकपा एमालेका वरिष्ठ नेता माधव कुमार नेपालले निर्वाचन आयोगमा नयाँ दल दर्ताको लागि निवेदन दिएपछि एमालेका अध्यक्ष केपी शर्मा ओलीले पार्टीको केन्द्रीय सदस्यको संख्या अद्यावधिक गरेर आयोगमा पठाएको थियो । गत भदौ १ गते मंगलबार मात्र ओलीले एमालेको आधिकारी माइन्युट गरेर २०३ सदस्य केन्द्रीय समितिलाई अद्यावधिक गरेर २६० संख्या निर्वाचन आयोगमा पठाएको थियो ।
तर, आयोगले नेता नेपालले आयोगमा दल दर्ताको लागि निवेदन दिएको अवस्थामा एमालेको २०३ सदस्यीय साबिककै केन्द्रीय कमिटीलाई मान्यता दिने भएको हो । आयोगले नेपाललाई फरक पार्टी ‘नेकपा एकीकृत समाजवादी’ दर्ताको लागि सनाखत गर्न आगामी भदौ ९ गते बोलाएको छ । नेपालले फरक पार्टी बनाउन अब २६० नभई २०३ बाटै २० प्रतिशत पु¥याउँदा हुने भएको छ ।
नेपालले २०३ सदस्यीय संख्यामा २० प्रतिशत पु¥याएको अवस्थामा नयाँ दलको मान्यता पाउने छ ।
प्रमुख निर्वाचन आयुक्त दिनेश थपलियाले एमालेको पहिलेको सूची अनुसार आफूहरुले हिसाब गर्ने बताए। ‘अस्ति आएको अध्यादेशमा महाधिवेशनबाट निर्वाचित सदस्यहरुको आधारमा २० प्रतिशत भनिएको छ। त्यसैले हामीले सोही अनुसार हिसाब गर्छौं। एमालेले बुझाएको नयाँ सूचीलाई मान्यता दिने वा नदिने भन्ने कुरा पछिको कुरा हो’, उनले भने।
भदौ २ गते जारी भएको राजनीतिक दल सम्बन्धी ऐन, २०७३ लाई संशोधन गर्न बनेको अध्यादेशमा ‘महाधिवेशनबाट निर्वाचित केन्द्रीय समिति र नयाँ दर्ता भएको दलको हकमा त्यस्तो दल दर्ता हुँदाका बखतको केन्द्रीय समितिको बीस प्रतिशत वा सोभन्दा बढी सदस्य वा त्यस्तो दलको संघीय संसद्को संसदीय दलको बीस प्रतिशत वा सोभन्दा बढी सदस्यले एकैपटक’ भन्ने वाक्यांश प्रयोग गरिएको छ।
