काठमाडौं, असार २४ गते। नेकपा (एमाले)का सांसद योगेशकुमार भट्टराईले सरकार संसदीय समितिप्रति गम्भीर नभएको आरोप लगाउनुभएको छ।
आइतबार सिंहदरबारमा बसेको सार्वजनिक लेखा समितिको बैठकमा बोल्दै उहाँले यस्तो बताउनुभएको हो। उहाँले समिति चलाउने, सन्दर्भमा सरकार जिम्मेवार नदेखिएको बताउनु भएको हो। उहाँले पछिल्ला ६ महिनाभित्र बसेका ४१ वटा संसदका बैठकमा प्रभावकारी नतिजा आउन नसकेको उल्लेख गर्नुभयो। उहाँले समितिको नेतृत्व चयन गर्न नसक्नु सरकारको कमजोरी भएको बताउनुभयो।
उहाँले भन्नुभयो, ‘संसद चलाउने, समिति चलाउने, सन्दर्भमा सत्ता पक्षको, सरकार जिम्मेवार देखिँदैन। संसद पनि राम्रोसँग चलिरहेको छैन। यो ६ महिनामा ४१ वटा बैठक भए यसको प्रभावकारी नतिजा छैन। संसदको बिजनेस सरकारले नै बनाउने हो, तर सरकारले प्रभावकारी ढंगले बिजनेस दिन सकेको छैन, बजेट, नीति ल्याउनु बिजनेस होइन। नियमित काम हो। समितिले दिएका निर्देशन नेपाल सरकार र सरकारका निकायले बिना शर्त कार्यान्वयन गर्नुपर्छ, जटिलता छ भने समितिमा आएर बताउनुपर्छ।’’
सांसद भट्टराईले संसदीय समितिले दिएका निर्देशन सरकार र सरकारका निकायले बिना शर्त कार्यान्वयन गर्नुपर्ने बताउनुभयो।
